Liverpool-ah Mac Allister a chiang ta

Brighton & Hove Albion midfielder Alexis Mac Allister chuan Liverpool chu pound maktaduai 55-in a zawm ta a, kum nga chhung khel turin contract a ziak - Brighton-ah hian kar khatah £50,000 a hlawh nia sawi a ni a, Reds-ah hian kar khatah £100,000 aia tlem lo a hlawh dawn niin khawthlang media-te chuan an tarlang.

Argentine playmaker hi Brighton-in Premier League-a parukna dinhmun an luah theih nan player pawimawh a ni a, World Cup 2022-a Argentina champion theih nana player thawhhlawk a ni phak bawk.

Kum 24 mi midfielder chuan, "Ka hlim takzet a, ka tan chuan mangram thleng dik ang mai a ni. Pre-season ṭan ni aṭanga he club zawm nghal hi ka duh avangin tuna kan inrem thei hi ka lawm hle - ka khelhpui turte nena inhmuh ka châk tawh hle," a ti.

Seagulls (Brighton sawina) tan match 112-a goal 20 khungtu chuan, "Ka tan chuan kum liam ta kha kum duhawm tak a ni. World Cup nomawi kan chawi a, Brighton-a kan thlen chin kha a lawmawm em em bawk. Mahse, tunah chuan Liverpool chiah ngaihtuah a hun ta a, player ṭha zawk ni a, mi ṭha zawk nih tumin ni tin ka bei ang," a ti.

Liverpool hian nipui transfer-ah James Milner, Naby Keita leh Alex Oxlade-Chamberlain te an chhuahtir avangin inthuamṭhat an mamawh a, Borussia Dortmund rawlthar Jude Bellingham man chu sang hreta an hriat avanga an inhnuhdawh hnuah Mac Allister lam an hawi ta a ni.

Argentina tana vawi 16 inlan tawh Mac Allister hian World Cup 2022-ah khan an match hmasa ber khel lo mah se, a hnu match rukah erawh inlan vekin, final-a France nen an inkhelah pawh a khel ṭha hle.

Mac Allister chuan, "World Cup nomawi ka chawi hnuah khan, nomawi tam zawk chawi ka duh thu ka sawi a, chu ka beisei tihlawhtling tur chuan Liverpool hian min puih theih ka beisei.

"Chu chu ka tum ber pawh a ni a, Liverpool ang club lian tana khelh chuan nomawi chawi ngei a ngai bawk. Player, staff leh thil engkim ka en hian, he club lenzia hi ka hai lo. Ka lawm takzet a, Liverpool tana khelh ka châk tawh hle a ni," tiin a sawi.