He club tana khelh hi nuam ka ti - Rice

West Ham chhuahsan tur anga sawi Declan Rice chuan Hammers chu a hmangaih thu leh, London club tana khelh chu nuam a tih thu a sawi - nomawi hian a chelh thei ang em, tih chu zawhna lian tak a ni.

Kum 24 mi midfielder chuan, "Tun dinhmunah chuan ka hma hun chungchangah hian titi lengvak a tam hle. An club-a khel tura min duhtu pawh an awm nual a, mahse, he club-ah hian kum hnih cham turin contract ka la nei a, he club hi ka hmangaihin, West Ham tana khelh hu nuam ka ti em em a ni," a ti.

West Ham boss David Moyes chuan an captain hi a chhuah mai a rin thu a lo sawi tawh - kum 2024 thleng contract a nei mek a, a ṭul dan a zira kum khat dang pawhsei theih a ni. Mahse, Rice hian contract pawtsei tura sawm a nihna chu a la hnar vek rih.

Pound maktaduai 100 aia tlawm lo tura sawi Rice chuan, "Tun dinhmunah chuan West Ham tana khelh chiah hi ka rilruah a awm. He club captain hi ka ni a, a ṭhatna bak sawi tur ka nei rih lo. Enge thleng dawn, han thlir phawt ila, a la hriat mai ang chu. Tuin nge sawi lawk thei?" a ti a, cham thei dinhmuna a din thu a sawi.

Hetihlai hian Hammers chairman David Sullivan chuan Rice chu a chhuah theih tur thu an tiam tawh thu a sawi a, "Thla 18 liam ta khan kar khata £200,000 hlawh turin kan ti a, mahse, a hnar a ni," a ti a, an player chuan an hnena a cham avangin hlawhah £10mtd a hloh ang deuhthaw a nih thu a sawi.

Sullivan chuan, "Player-in chhuah a duh chuan chelh reng theih a ni lo. An rawn dawr ṭanin ka ring. Club pathum emaw pali emawin an duh tih kan hria a, mahse, kan inkhelh lai a nih avangin an nghak rih a ni," a ti.

Declan Rice hi kum 1965-a Bobby Moore hnua West Ham captain ni chunga European nomawi chawi leh hmasa ber a ni a, Moore hian European Cup Winners' Cup-ah Hammers hi a champion pui a, kum 1975 leh 1980 FA Cup-a West Ham champion puitu Billy Bonds hnua Hammers captain zinga champion nomawi chawi leh hmasa ber a ni bawk.