Mang ram kha a tak ramah
West Ham chairman David Sullivan chuan an khelmual hlui Upton Park aṭanga London Stadium-a an insawn khan, an rilru luahtu ber chu tun anga champion nomawi chawi a nih thu a sawi.
Sullivan chuan, "Khelmual thar kan luah khan, tun ang hun duhawm tawn hi kan beisei sa a ni. Tunah chuan kan hlawhtlinna, kan Under-18 academy te hlawhtlinna pawh tiamin, heng aṭang hian hmasawn zel kan tum ang.
"Kan mipa team emaw hmeichhe team emaw pawh ni se, West Ham jersey haa bul an ṭan apiangin, hlawhtlinna thar an chan zel theih nan theihtawp kan chhuah zel ang," a ti.
Hammers tan tun season hi hun duhawm bik a ni - ECL nomawi an chawi bakah hian West Ham U18 academy te chuan Premier League South leh FA Youth Cup-ah champion nomawi an chawi a ni.
West Ham hi season laihawl velah kha chuan an talbuai ve hle - rei tak chhung chu Premier League aṭanga relegate thei dinhmunah hial an ding hman a, Moyes an ban mai rinna pawh a lian hman.
Mahse, a tawpah Scottish coach an rin ngamna chu an hlawh chhuak a, Premier League a inhamtanpui bakah champion nomawi a chawipui - hei lo liam enge beisei tur awm chuang?
Moyes chuan, "Tun hnai kum thum chhunga Hammers hlawhtlinna ka thlir a, league-ah parukna leh pasarihna kan ni a, European semifinal kan khel a, tunah chuan European nomawi meuh kan chawi ta.
"Kum thum liam taah khan heng thil zawng zawng hi a thlen tur thu sawi ta ila, mi tam tak chuan mi â ang maiah min ngai ang," a ti a, an thil tawn chu an beisei phak bak a nih thu a sawi.
Moyes chuan sawi zawmin, "He club-ah hian ka vannei takzet. Thlawp ka phu loh lai pawhin min thlawp reng a ni," a ti a, hun harsa a tawh laia amah ban duh lotu club a hre reng.
Hetihlai hian Fiorentina player Cristiano Biraghi chu inkhelh laiin Hammers fans ṭhenkhatin an lo vawm a, West Ham chuan he thil thleng hi an dem thu sawiin, he thiltitu chu hriat an nih veleh an chungah hremna an lekkawh tur thu an sawi.
Team pahnih inkhelh hma hian Italian club ṭantute chuan West Ham ṭantute kut an thlak bawk a, mi 16 ngawt man an ni.