Zverev hmachhawn tur Ruud

French Open semifinal a hmuhnawm dawn, zanin hian player ṭha pali an inlan dawn. Alexander Zverev leh Casper Ruud ten semifinal luh an inchuh ang, player pahnih hi a vawi khat nana Grand Slam nomawi chawi beisei lai an ni.

Nilaini zan quarterfinal inkhelah Zverev hian Tomas Martin Etcheverry chu 6-4, 3-6, 6-3, 6-4 in a hneh a, clay court inelna lian berah hian a zawn a vawi thum nan a thiam zual pali zingah a tel ta.

Season hmasa khan Zverev hian semifinal a lut a, mahse Rafael Nadal nen an inkhelh laiin a hliam. A ka rek hliam vangin kum chanve chhung vel chu a inkhel zui thei lo, a hnu lamah erawh ṭha takin a inkhel thei leh tawh.

Zverev chuan, "Tennis hi ka thinlung zawng zawngin ka hmangaih a, chuvangin nikuma hliam ka tawrh kha ka hringnuna hun harsa leh hrehawm berte zinga mi a ni chiang hle. A nihna takah chuan Roland-Garros semifinal thleng leh hi ka tan chuan a hlu bik," a ti.

Geman tlangval Zverev-a khingpui tur Casper Ruud hian quarterfinal inkhel dangah Holger Rune chu 6-1, 6-2, 3-6, 6-3 in a lo hneh ve thung, final luh inchuh tur pahnih hi an inkhel tawk hle tura ngaih a ni.

Ruud hian season hmasa khan Nadal nen chanchin a lo nei ve tho, final lutin nomawi inchuhna inkhelah Nadal a ngam lo. Kuminah chuan Spanish star hi hliam vangin a inlan thei lo a, player dang tan champion theihna kawng a inhawng dawn.

Seeded parukna Ruud hian season hmasa khan a hmang ṭha - French Open leh US Open final a lut thei, mahse a champion zo lo ve ve. Kuminah atan hun ṭha a inherchhuak ve tawh mai thei, chumi tur erawh chuan match hautak pahnih a paltlang a la ngai dawn.

Norway tlangval Ruud chuan, "A nihna takah chuan seeded palina ni mah ila ka khungpui seeded parukna Rune kha chak tura rinkai zawk a ni, a chhan pawh kan intawn hnuhnung berah ka ngam lo, mi tam takin ka chak an ring lo kha a mak lo.

"Mahse, vannei takin hnena ka chang a, tunah chuan semifinal chauh ka ngaihtuah tawh. Grand Slam-ah chuan set hnih lak hnuah pawh hian a la chetsual hle theih a ni tih ka hriat thar nawn a ngai," tiin a sawi.