Thilmak beiseitu Chelsea-in Germany an pan

Zanin dar 12:30 a her chhuak ang a, German champion Bayern Munich chuan Champions League last 16 second leg khel turin Chelsea an mikhual dawn. Stamford Bridge-a inkhelah Bayern hian 3-0 in hnehna an lo chang tawh a, Frank Lampard enkawl Chelsea tan hnehna chang tur chuan thilmak a thlen a ṭul tawh ang. 

Champions League 2018-19 season-ah Tottenham Hotspurs-in Ajax lakah thilmak an thlentir tawh a, Liverpool-in champion nomawi an chawina kawngah Barcelona chu thilmak an lo hmuhtir tawh bawk. 

Chelsea tan comeback hi tih theih loh a ni lo tih hei hian a lantir a, zawhna awm erawh Liverpool leh Spurs anga thilmak thlentir turin Chelsea hi an ṭha tawk ang em, tih chu a ni. 

Chelsea hian an ṭhat dan berin khel thei pawh ni se Bayern laka si thum phur saa khelh chu a hautak dawn tih mi a ni leng lo tan chuan hriat sa a ni a, an ṭhat dan berin an la zin thei lo zui! Blues-in FA Cup final vangin player inhliam an ngah belh a, Lampard-a'n Germany-a zin turin academy player pathum Lewis Bate, Dynel Simeu leh Ian Maatsen-te chu squad-ah a telh. 

Player pathum zingah hian Maatsen chiah hi senior team tana inlan tawh a ni a, September-a League Cup-a 7-1 a Grimsby Town an hneh ṭumin bench aṭanga luhtir a ni - Bayern laka hmachhuan atan chuan a 'nau' deuh a ni. Chelsea-in hliam vangin tawnhriat nei lo rual player an hruai a ngai a, Lampard tan a harsa dawn tih loh rual a ni lo - a ṭul thuta koh theih tur zingah academy player Armando Broja leh Henry Lawrence te chu dah an ni bawk. 

FA Cup final-a Arsenal an ngam loh ṭumin Chelsea player pawimawh Christian Pulisic leh captain Cesar Azpilicueta te chu an inhliam a, Blues tana season duhawm tak hmangtu Pulisic inhliam hi Chelsea tan a pawi lehzual. 

Borussia Dortmund aṭanga hming chher attacking midfielder hi player theihna nei sang bik a ni a, Bundesliga-ah season li ngawt hun a lo hman tawh bawk avangin Bayern hrechiangtu a ni. Captain America hming lem an pek hian tun season inelna hrang hrangah Blues tan match 34 khelin goal 11 a khung a, assist vawi 10 a nei bawk - Chelsea tana a ṭangkaizia hmuh hmaih theih a ni lo. Bayern laka thilmak thlentir an mamawh lai taka Chelsea-in Pulisic an chhawr thei lo tur hi Blues fans tan lungngaihna tham a ni a, Chelsea 'chance' a chhe sawt, ti pawhin sawi theih a ni. 

Chelsea player zingah Pedro chu FA Cup final-a inhliam dang a ni a, season tawp ruala London club chhuahsan tur forward hi a dar hliam vanga zai niin thla khat tal a chawl dawn. Blues fan-ten Spanish forward hi an club jersey nen an hmu tawh dawn lo tihna a ni. 

Willian-a'n hliam tenau vangin FA Cup final a khel lo tawh a, Lampard-a'n chhawr lui duh se Bayern lakah a chhawr theih a rinawm. Mahse, Brazilian winger hi Arsenal nen kum thum contract ziak turin an indawr mek a, Lampard-a'n chhawr loh a thlan zawk a rinawm. 

FA Cup final-a hliam vanga inlan thei lo Ruben Loftus-Cheek-a'n Champions League last 16 khelh hram a tum a, N'Golo Kante chu 100% a la ni lo bawk - Chelsea dinhmun a ṭha lo. Hliam vang pawha an buai tawh tehreng nen, Chelsea-in hrem vangin harsatna an la nei cheu. Bayern an mikhual ṭuma hnawhchhuah Marcos Alonso leh tun inelnaa a yellow card pathumna hmutu Jorginho-te chhawr theih an ni dawn lo a, Billy Gilmour a inhliam bawk. 

Stamford Bridge-ah 3-0 a an chak tawh avangin Bayern tan harsatna a awm dawn lo tih a chiang a, Chelsea laka tlawm tur chuan goal li tal an chhuah a ngai dawn tihna a ni. Chelsea an sawp hnuah Bayern Munich hian an match khelh zawng zawngah hnehna an chang vek a, Bundesliga leh DFB-Pokal-ah an champion - match 17 chhung chu a zawnin an chak tawh!

Bayern boss Hans-Dieter Flick-a'n 3-0 in hma hruai mah se an ṭhat dan bera squad-a rem khawm tur thu a sawi a, chutiang a nih chuan Serge Gnabry, striker khel ṭha tluang em em mai Robert Lewandowski leh Thomas Muller-te an rawn inlan dawn tihna a ni. Hetihlai hian Bayern an dam kim bik lo. Benjamin Pavard chu training-naa hliam vangin a inlan theih a rinawm lo a, holding midfield lama nuam ti taka khel ṭhin Joshua Kimmich hi right back-ah pawt let leh a ngai dawn niin a lang.