Heat lakah Nuggets chungnung

Nikola Jokic leh Jamal Murray te awmna Denver Nuggets chuan Miami Heat 109-94 in an hneh a, a ṭum hnih nana an chak avangin NBA Finals khelh laiah 2-1 in an chungnung mek - Inrinni zingah game 4 an khel leh ang.

Nimin zing FTX Arena-a inkhelah Nuggets tan Nikola Jokic chuan minute 44 chhungin point 32 neiin rebound vawi 21 a lak bakah assist ṭum 10 a nei bawk - NBA Finals bikah chuan hetiang ti thei hmasa ber a ni.

Jokic bakah Murray a langsar - ani pawh hian 34 point, 10 rebound leh 10 assist a nei thei a, player pahnih an chet ṭhat em avangin anmahni mualah ngei pawh Miami Heat an chak chhuak thei lo.

NBA Finals bikah chuan Jokic leh Murray te hi team pakhat tana triple-double nei rual thei awmchhun an ni. NBA huang pumpuiah pawh point 30 nei tling chunga team pakhata miin triple-double an neih rual vawi khatna a ni hial.

Nuggets coach Michael Malone chuan, "Kum sarih chhung an khel dun tawh a, ka hriat chinah chuan a ruala match khat an khelh fuh dun ber ṭum a ni. Jokic-a thil tih khan min barakhaih lo, a chhan chu a theihna ka hrechiang.

"Jamal pawh hi a theihna ka ringhlel ngai lo, vawi tam tak a ṭha bik a nihna a lantir tawh ṭhin. Anni pahnih an langsar a nimai a, player dang zawng zawng khan hnehna kan chan theih nan an thawhhlawk vek," a ti.

Nuggets hian a vawi khat nan NBA champion nih an beisei mek a, an tum ram thleng tur erawhin a tlem berah vawi hnih tal an chak a la ngai dawn - Heat pawhin seeded hniam ber (8) ni chunga champion thei hmasa ber nih an la inbeisei ve bawk.