Sindhu chhantu Gopichand

India chief national badminton coach Pullela Gopichand chuan PV Sindhu chu a la tlachhe lo tih a sawi a, tun hnaiah result nei ṭha tawk lo mah se Indian player ṭha berte zinga mi a la ni reng tih a sawi.

Nikum August thla khan Sindhu hi a inhliam a, a hliam vang hian thla li chhung vel a inkhel thei lo. A dam hnuah inkhel leh thei tawh mah se ngai a la awh thei lo a, a la champion leh miah lo.

Spain Masters leh Malaysia Masters-ah te semifinal a lut a, a bak chu thlen san a nei ngai lo. Tournament a khelh hnuhnung Singapore Open-ah phei chuan a match hmasa berah a chak lo nghal a ni.

Gopichand chuan, "Tunah hian PV Sindhu hi kum 27 mi chauh a la ni a, a la upa lo hle. A kum thlir chuan vanglai hmang thei tur chauh a la ni a, a kum hi chhuanlam atana hman chi niah pawh ka ngai lo.

"Hun rei tak chhung chu khawvela a ṭha berte zinga mi a ni thei, tun hnai tlahniam ve hret mah se a nihna ang takah a lo kir leh ngei ang tih hi ka ring," tiin a lo enkawl tawh ṭhin Sindhu lakah beisei a la nei.

Sindhu hian Olympic medal vawi hnih a la tawh, Indian badminton player zingah chuan hetiang ti thei awmchhun hi a ni.