Tihsual kha inzir nan kan hman a ngai - Walker

Manchester City defender Kyle Walker chuan Champions League final an khelh tur a thlirlawk a, kum 2021 Champions League final-a Chelsea laka an chak lohna chu inzir nan an hman a ngai tih a sawi.

Blues nen UCL final an khelh dawn khan Pep Guardiola naute kha chak tura rinkai an ni a, mahse khatih laia Thomas Tuchel-a kaihhruai Chelsea tan Kai Havertz chuan goal awmchhun khungin an champion ta zawk.

Premier League champion Man City hian Inter Milan nen Inrinni zanah UCL final an khel dawn. EPL bakah FA Cup nomawi an la tawh a, tun season chhungin nomawi hlu bik pathum chawi thei dinhmunah a ding.

Man City defender Walker chuan, "Team ṭha tak kan ni a, pawn lam aṭanga fakna leh duhsakna pawh kan dawng nasa ve ṭhin hle. Chutihrualin, Champions League champion ni tur chuan khawvela a ṭha ber kan nih a ngai.

"Tun hnai season ruk chhunga kan hlawhtlinn a hrang hrangte hi a ropui, chutihrualin kan champion tawhna lam ai chuan kan hmabak kan thlir a ngai. Tunah hian Pep-a hoin hun ṭha a vawi hnih nan kan nei dawn.

"Chelsea nen kan inkhelh ṭuma thil thleng kha kan la hre reng, chuvangin tihsual nawn a remchang tawh lo. Kan manager pawhin chu chu a hrechiang a, tihsual nei lo turin inbuatsaihna pawh kan nei ngawrh hle," tiin a sawi.

Man City hi an champion thei a nih chuan Manchester United hnung an zui dawn. Sir Alex Ferguson kaihhruai Man United khan 1999 khan EPL, FA Cup leh Champions League a la kawp - English club zingah hetiang ti thei dang an la awm ngai lo.

England international Walker chuan, "Man United leh hneh loh nei loa champion Arsenal te kha English team ṭha berte zinga mi an ni. Tun hnaiah keini leh Liverpool pawh na takin kan inel a, team ṭha tak pawh kan ni ve bawk.

"Kan hmaa team ṭha dangte tih ang tih ve vek tum chu thil ṭha ber a ni kher lo ang, chutihrualin an theih chu keini pawhin ka ti ve thei tih hriat a ṭha, season duhawm kan hman hi a ṭha thei ang bera khar kan tum," a ti.