Pep-a leh City tan hun ṭha a her chhuak dawn em?

Spanish coach ropui Pep Guardiola-a'n kum 2016 aṭang khan Manchester City a enkawl ṭan tawh a, English club-ah season sarih hun a hman chhungin nomawi 13 a chawi a, Premier League-ah vawi nga a champion pui.

Barcelona boss hlui hian khawvela football league hautak ber ang hiala sawi meuh pawh a thunun tih loh rual a ni lo a, season sarih chhung hian khawvela coach langsar ber ber Arsene Wenger, Jurgen Kloop, Jose Mourinho, Antonio Conte leh Thomas Tuchel thlengin a hmachhawn vek!

Mahse, heti chung hian mi tam takin coach ropuia chhiar harsa an ti tlat a, bazar-na tur sum tam tak nei chunga Man City tana Champions League nomawi a chawi thei lo chu amah kawh nan ber an hmang - mahse, zanin dar 12:30-ah sawiseltute ngawihtir turin hun ṭha a nei dawn e.

City hian Champions League final-ah Inter Milan an hmachhawn dawn - English club hian Premier League leh FA Cup nomawi an chawi tawh avangin treble champion thei dinhmunah an ding a, European football-a nomawi ngaihhlut hlawh ber hi an chawi leh a nih chuan Pep hi sawi hnawm a thiang tawh lo ang.

Mahse maw...

Team pahnih squad khaikhin ila, an sum neih zat thlir ila, a tam zawkin City hi chungnung zawkah kan dah ang - mahse, chu ringawt chu football teh nana hman a remchang lo a, 'eng pawh a thleng thei,' tia an sawi ṭhin infiamnaah hian Inter Milan dah hniam a remchang lo.

Simone Inzaghi hian season ṭantir lamah 'high-press' en chhin mah se a hlawhtlinpui lo a, a thiam sa 3-5-2 hmanga a naute a rem chiahin an hmuhnawm a, an theihna tak tak hmuh turin a awm - a tifiahtu chu inelna hrang hranga an match hnuhnung 12-a vawi 11 an chak chu a ni.

He formation-ah hian counter attack chu innghahna niin, midfield-ten tlarhma aiin centre back an hnaih zawk a, mual sir aṭangin a wing back neih ṭhatten counter attack-ah team an pui ṭha ṭhin viau bawk.

Heng zawng zawng hi City hian an dang zo ang em, tih chu zawhna awm a ni a, Inter hian Serie A nomawi chawi lo mah se Coppa Italia nomawi an chawi tawh avangin an inrintawkna a sang hle.

Ṭha ve ve

City tana player pawimawh sawi dawn chuan Kevin de Bruyne a sawi loh theih loh a, kum 31 mi midfielder hian tun season match 48 a khelh aṭangin goal 10 a khung a, assist 31 ngawt a nei tawh - Inter tan chak tur chuan ani hian tun season-a goal 52 khung tawh Erling Haaland a zawn fuh loh a ṭul ang!

Kum 22 mi Haaland dah ṭha turin kum 35 mi defender Francesco Acerbi a pawimawh dawn a, Acerbi bakah Alessandro Bastoni leh Matteo Darmian te an pawimawh dawn - midfield-ah Brozovic leh Nicolò Barella ten City player-te tan hmun awl an siam loh a ṭul bawk ang.

Pep-a'n 3-2-4-1 a rawn hmang leh ngeiin a rinawm a, Inter hian KDB leh Haaland inthlunzawm tur hi dah ṭha thei pawh ni se manganna tur a la tam - midfielder Ilkay Gündogan, Jack Grealish leh Bernardo Silva te pawh hi an khelh ṭhat ni chuan mahnia game thlak danglam thei ṭhiau an ni.

City tan tlarhnung venpui kawnga Rodri ṭhat tawkzia hi inhrilh nawn a ngai lo a, defensive midfield-a chhawr thar John Stones hian a position thar hi atana duan sa reng emaw tih mai turin a luah hneh viau bawk.

Nghilh loh tur

City tan theihnghilh thiang lo a awm a, chu chu Inter tlarhma hi a ni - City striker hlui Edin Dzeko, Lautaro Martinez leh Romelu Lukaku an awm a, Inzaghi-a'n duhthlan tur a nei ṭha thawkhat hle. Wing back aṭanga tlarhma pui thei Denzel Dumfries, Federico Dimarco leh Robin Gosens te ho kan la sawi tel lo mah mah!

Italian coach hian tun laia an uar tawh loh ang takin tlarhmaah striker pahnih a dah ṭhin a, kum 37 mi Dzeko leh Martinez a inkawptir tlangpui. Dzeko-a'n tun season-ah goal 14 khungin assist vawi nga a nei a, City tana EPL nomawi pahnih lo chawi tawhtu a ni.

Kum 25 mi Martinez hi sawi hmaih a thiang lo - tun season inelna hrang hrangah goal 28 ngawt a khung a, a career-a season khata goal a khung hnem ber hun a hmang mek. Lukaku hian goal khung a uar leh ṭan tawh a, a tharum nen a ṭangkai leh dawn.

City tan tlarhnungah Reuben Dias, Manuel Akanji leh Kyle Walker ten an theihna tak tak an pholan a ṭul dawn a, Stones leh Rodri ten an ṭhiante an puih ṭhat viau a ṭulin a rinawm.