Swiatek hmaah Karolina Muchova

French Open 2023 hmeichhe singles final tur a chiang ta - world number 1 Iga Swiatek hmaah Karolina Muchova a ding dawn. Inrinni zan dar 6:30 hian Court Philippe-Chatrier-ah an inkhel ang.

Champion lai Swiatek hian Ningani zan khan seeded 14-na Beatriz Haddad Maia chu 6-2, 7-6 (7) in a hneh a, tun hnai kum li chhunga a vawi thum nan final a lut, sulhnu a nei ṭha rem rem hle.

Polish nula Swiatek hi nuamsa taka chak erawh a ni bik lo. Set pahnihah hian a service a hloh hmasa ve ve a, mahse huaisen takin a tho chhuak a, hnehna a chan avang hian champion lo mah se tournament a zawh hunah pawh world number 1 a ni chhunzawm dawn.

Kum 22 mi Swiatek chuan, "Grand Slam hi chu a khelh chhung a rei a, chawlhkar hnihna tawp lamah hi chuan taksa a chau tawh viau zel. Kar hnih chhung nghet leh ṭha taka ka khelh theih a vangin ka lawm hle.

"Final khelh hmabakah hian boruak a danglam loh ka beisei, match dang ang bawkin nuamti taka khelh leh tawp mai ka duh. Inkhel pawimawh bik chu a ni ngei mai, mahse ṭan ulh a awm theih avangin fimkhur takin ka khel ang," a ti.

Semifinal inkhel dangah Karolina Muchova chuan Australian Open champion Aryna Sabalenka chu 7-6(5), 6-7(5), 7-5 in a hneh, hnehna chang tur hian darkar thum leh minute 13 chhung hial an inkhel a, a tawpah Muchova a dingchang.

Sabalenka hi tun hnaiah a khel ṭha, a bik takin Grand Slam bikah phei chuan a zawna match 12 chak thei a ni. Serena Williams (2015) hnuah season tir lama khelh Australian Open leh French Open title la kawp nih an tum a, mahse a beiseina a thamral leh ta rih.

Hnehna changtu Muchova tan erawh mellung pawimawh leh hriatreng tawh tur a ni thung. Seeded zinga tel phak lo Muchova chuan, "Ka hrisel tawk lo a, hliam ka nei ve fo bawk - season hmasa khan Australian Open pawh ka khel thei lo.

"Inkhel thei loa ka awm lai khan, doctor ka biak rawn ṭhenkhat chuan tennis ka khelh leh theih an ring tawh lo. Mahse, beidawng loin ka bei lui hram hram a, nasa taka ka takasa sawizawi chungin tun dinhmun hi ka thleng," tiin a sawi.

Mipa Final

Nizan khan mipa singles semifinal khelh a ni a, world number 1 Carlos Alcaraz leh Novak Djokovic ten an inkhel a, inkhel dangah Alexander Zverev leh Casper Ruud te an inkhel thung a, result erawh kan hre hman lo.

Semifinal lut player pali zingah Djokovic chauh hi French Open champion tawh a ni. Season hmasa khan Ruud hian final lut mah se nomawi inchuhna inkhelah Rafael Nadal a ngam lo a ni.

Tun season French Open chu vawi 14 champion tawh Nadal a inlan thei lo a, midang tan nomawi chawi theihna kawng zau takin a inhawng a, chhawr ṭangkai ngei pawh an tum ang.

Serbian star Djokovic hi a champio thei a nih chuan, hard court, grass court leh clay court-a khelh Grand Slam-a vawi thum champion tling vek thei hmasa ber a ni ang.

Mipa singles final hi Pathianni za dar 6:30-ah khelh a ni ang.