Marquez hma hun la chiang lo

MotoGP rider ṭha Marc Marquez hian Repsol Honda bike lo chu a la khalh ngai lo, tun hnaiah Ducati nen sawizawm a ni. Spanish tlangval hian a hma hun chiang takin a sawi thei rih lo.

Marquez leh Honda inremna hi kum 2024 thleng a ni. Marquez chuan, "Ruahmanna pawimawh leh ṭha zawkah chuan Honda a awm reng, tunah chuan khaw dang hawi thei dinhmunah ka ding lo tih pawh ka hria.

"Ka ban ruh hi tun hnaiah vawi li ngawt zai a ni a, ngai ka awh leh theih nan theihtawp ka chhuah mek. Intlansiak khawvelah chuan tuten nge hnehna chan tum a, champion tuma bei tih kan hriat a ngai, chak duha beite bula awm ka duh," a ti.

MotoGP champion vawi ruk ni tawh Marquez hian hliam a neih hnuah beisei a la phak leh lo a, season kal laiah pawh chak ni hmel a la hmu lo. Honda hian a duh leh beisei ang bike an siamsak chiah em hriat a ni lo a, team lam tan pawh hliam vanga harsatna nei reng hi ngaihtuah nawn a ngai vein a rinawm.

Bike intlansiakna sang ber hi tun season chhungin vawi kua an tlan tawh - Francesco Bagnaia (vawi 4), Marco Bezzecchi (2), Brad Binder (2) leh Jorge Martin (1) te chauhin chak ni hmel an la hmu.

Intlansiak vawi 10-na atan June 11, Pathianni tlai dar 5:30 hian Mugello Circuit-ah Italian Grand Prix an tlan leh ang.