Tuichangral lakah Hunthar an chungnung

Volleyball thiam veng tia hriat lar Hunthar chuan Tata SK Pro Volleyball League 2023-ah pawh an thiam zia an lantir. Ningani zan R. Dengṭhuama Indoor Stadium, Mualpuia inkhelah Tuichangral chu 25-20, 21-25, 25-23, 25-20 (3-1) in an hneh.

Hunthar tan hian state pawn player Gagandeep Singh a langsar, an chakna chhan ber erawh a ni bik lo. Gagandeep Singh hian point 25 a nei a, ani bakah hian tualchhung player Laldensanga leh Lalruatfela Sailo te chuan point riat ve ve an nei bawk.

Player dang Zomuansanga (9 points), Lalramnunfela (7) leh Lalnunfela (4) te an khel ṭha bawk a, thawhhona ṭha chu an chakna hnar a ni. Zanin hian a hmun ngaiah Durtlang North nen an inhmachhawn leh nghal ang.

Tuichangral tan Vinod Khatkar chuan point 28 ngawt neiin D3 Business Player of the Match atan thlan a ni hial a, point 16 neitu Saidingpuia Sailo a langsar bawk. Mahse, thlawptu dang an ṭha tawk lo a, hun pawimawh laia point hloh zawk an nih ṭhin chu an tuar bawk.

Inkhel dangah Chhinga Veng Spikers chuan Tuipuiral chu 25-16, 22-25, 25-20, 25-19 (3-1) in an hneh ve bawk a, hmeichhe inelna lamah Kanan chuan Bethlehem Vengthlang an hneh ve bawk a ni.

Chhinga Veng hian 2019 final-ah Durtlang North hnehin a vawi khat nan an champion a. Covid-19 leng vanga kum hnih awl a nih hnuah nikum khan Pro Volleyball chhunzawmin, league match vawi li an khelhah champion lai Spikers an tlawm vek.

Season kal mekah 2022-a Durtlang North champion team player pawimawh Lalbiakmuana an la lut a, tun tournament atan Rajasthan player tha Javed Khan la lut bawkin champion leh tumin team thar an din - an hmuhnawm chho leh dawn.

PVL team thar Tuipuiralin a tum ber pakhat Pro Volleyball khel thei mah se inkhel boruak leh kawng hrang hrangah an la mikhual a; chutihrualin set khatna an hloh hnuah Delhi aṭanga an lak luh Anurag Rawat chuan team tan beiseina a siamsak.

Mahse, Mizo player khaikhinin tawn hriat leh theihna hrang hrangah Chhinga Veng an khan lo deuh. Set khat ve ve an lak hnuah Tuipuiralin harsatna tawk zuiin Anurag a mal ṭan nasa deuh a, lehlam an bei let zo tawh lo.

Mizorama a inkhelh vawi khatnaah team a chakpui mahse Anurag-a'n hming a chher nghal a, point 35 hmuin point 20 a hloh thung a, D3 Business Player of the Match lawmman a dawng.