Inter Milan an hlauthawng lo

City ṭhatzia a sawi nawn loh theih loh a, Inter tana a harsat turzia pawh khawthlang media lamin an sawi nasa. Mahse, Italian club hi an zam lo a, an tana nomawi chawi theihna remchang hi bawhpelh an tum lo.

Inter boss Simone Inzaghi chuan, "Kan thil sawi hi football match a ni mai a, engmah hlauh tur a awm lo," tiin City lakah hlauhthawnna an neih loh thu a sawi a, defender Alessandro Bastoni chuan, "Footballer ni loin, tualthattute alawm hlauh tur. Hlauhna chungchang kan sawi chuan kan tisual ang," a ti a, chak ngei a tum.

Italian club langsar Inter hian Champions League nomawi hi vawi thum an lo chawi tawh a, 1963-64 leh 1964-65 season khan a zawna champion, kum 2010 khan an champion leh bawk -an champion hnuhnun ber hi Jose Mourinho hnuaia an khelh lai a ni a, treble champion an ni.

Inter right back Denzel Dumfries chuan, "Europe-ah chuan tumahin Inter hmachhawn hi an châk ngai lo. Rin loh zawk, tihte chu lehkhaa inziak kha a ni mai a, final hi chu a dan a dang daih zel. Thil tam tak a thleng thei a, hnehna chan tumin final hi kan khel dawn," a ti.

Pep Guardiola-a'n kum 2009 khan Barcelona chu Champions League nomawi a chawipui a, hetihlai hian Inter boss Inzaghi chuan Lazio tan a la khel - mahse, kum 47 mi boss hian Italian football-ah chuan dah san a hlawh tawh hle.

Lautaro Martinez chuan, "Kan coach hnuaia khelh hi nuam kan ti hlawm hle. A chhan chu hna a thawk ṭha a, kan khelh tur apiang tan inbuatsaihna a nei ṭha ṭhin viau a ni," a ti.

Inzaghi hi 'King of Cups' tiin hming lem an pe hial a, football coaching-ah season sarih chiah hun la hmang mah se Lazio kha Coppa Italia (1) leh Supercoppa Italiana (2) ah te champion nomawi a chawipui a, Inter Milan tan Coppa Italia (2) leh Supercoppa Italiana (2) nomawi a chawi bawk.

Italian coach hian, "King of Cups hminglem min pek hi ka lawm khawp mai," tiin a sawi - zaninah a dikna belhchhah turin champion thei tak ang maw, kan hre thuai dawn e.