UCL Final 2023: Man City vs Inter: Beiseina - chen ngai lohna ram!

Kum 2008-a Abu Dhabi United Group-in City an lei khan nasa takin Manchester khaw club hi an thlak danglam a, tun hnai season 122 chhungin Premier League-ah vawi sarih ngawt an champion thei - a nep lo.

Mahse, he club hian duh pakhat an la nei cheu a, tun thlengin a hlawhtlinna an la hmu thei lo - chu chu European champion nih a ni a, tun season-ah ngat phei chuan a lungthu kima champion theihna kawng a inhawng mek.

Kum 1999 khan Sir Alex Ferguson-a enkawl Manchester United chu treble champion an lo ni tawh a, English club ti ve thei dang an awm loh reng hnuah City chu United hnungzui thei dinhmunah an ding mek - pen khat chiah a ngai ta.

City thiampuipa Kevin De Bruyne chuan, "Tun thlengin European champion kan la ni lo. He hmunah hian kum riat ka awm ta a, hun duhawm tak kan hmang. Etihad Stadium ka pan khan heti zat game khelh tur leh nomawi chawi tur hi ka ngaihtuah phak lo.

"Mahse, kan la chawi miah loh nomawi a awm a, chawi pawh kan duh takzet. Zanin hi chu hun duhawm chu a nih kan beisei," a ti a, nomawi nen Istanbul chhuahsan ngei a tum.

City defender, tun hnaia defensive midfielder-a chhawr ṭhin John Stones chuan, "Inter hi vanneih vanga Champions League final khel tur an ni lo. Player ṭha tak tak an nei tih pawh hmuh theihin a awm reng alawm.

"Game pawimawh taka an khelh ṭhin dan pawh kan hmu reng a, Champions League semifinal-a derby khelhte kha thil awlsam a ni lo - eng ang team nge kan hmachhawn dawn, kan hria a ni," tiin inkhel tura a inpeih thu a sawi.