West Ham fan-ten champion an lawm

Premier League club West Ham chuan Europa Conference League champion nomawi an chawi chu an lawm a, West Ham khelmual hlui Boleyn Ground stadium bula World Cup 1966 champion-te chawimawina Champions Statue aṭanga kawng zawh ṭanin, Stratford Town Hall thleng an zawh a ni.

West Ham boss David Moyes chuan, "A ropui takzet. Prague khawpuiah khan mak khawpa tamin min thlawp a, East London-a min lo thlawpnate hi ava ropui em. Zan duhawm tak kan hmang a, kan hnathawh hi hlim takin kan lawm ang.

"He club tana nomawi chawi hi eng ang taka hlu nge a nih pawh ka la hrethiam lo, a special takzet a, thu sawi mai tur pawh ka haihchham rih hle a ni," tiin a sawi.

Hammers hian Europa Conference League nomawi an chawi avang hian season tharah Europa League an khel dawn a, David Moyes-a hoa hlawhtlinna chhar belh zel an beisei ang.