CYMA Football 2023 champion Venghnuai

Venghnuai hun a thleng ta. Mizoram Premier League final-a ṭahna mittui nena RG Stadium chhuahsantu Venghnuai chuan CYMA Football final zawhah lawmna mittui nen RG Stadium an chhuahsan ta thung.

LBS Suzuki 21st Inter Branch YMA Football Tournament chu Zirtawpni zan khan RG Stadium-ah khelh a ni a, ZD Lalthansanga freekick hamngin Veghnuaiin 1-0 in Tlangnuam 1-0 in an hneh a, a vawi khat nan an champion.

Veng leh football hmangaihtu
Nimin tlai aṭangin ruah a sur ṭan a, zan lamah pawh a sur zui zel. RG Stadium pan hun tawhah pawh ruahsurin ban zai a rel lo.

Mahse, veng leh football hmangaihtute, ruah dan zawh rual an ni lo. Tlangnuam leh Thakthing ṭantute bakah football hmangaihtuten Mualpui lam panin an kal duah duah.

Ruahsur hnuaiah RG Stadium mawi tham an pung khawm a, inkhel entuten nihliap an khum bakah rain coat ha chungin inkhel an thlir. Ruah do tawp an awm bawk a, football ropuina a lang.

A goal lo
Final boruak sangah coach pahnihin an player rin ngai bawk an ring. Venghnuai coach K. Lalthlamuana'n an ṭhenawm Salem Veng an hneh ṭuma bul ṭantute bawk a chhawr.

Tlangnuam coach Francis Lalpekhlua'n Bawngkawn hnehtute ṭangin player pakhat chauh an thlak a, hrem vanga semifinal khel thei lo PC Lalchhanchhuaha aiah Jones Lalṭhakima a rawn lut thung.

Chhum zin vangin inkhelh ṭantirh lam a hmuhnawm thei lo a, thil awm dan hmuh thiam a har. Team pahnih an inngam tawn a, khelmualah tui a tlin avangin awmze nei erawhin an inawr thei lo.

Venghnuai midfielder TS Zadeng ball vawrhluh chu keeper Lalbiakkima'n a tiper a, C. Nuna'n chang mah se Tlangnuam defender Lalmuanpuia a inrawlh hman.

Tlangnuam winger CVL Remtluanga pawhin ṭha takin a lalut a, penalty beiseiin box chhungah tlu mah se referee-in penatly a pe lo. First half-ah goal a lut lo a, inkhel erawh a nung hle.

TS-a ke vei lam
Second half-ah pawh first half ang thoin chhum a zing a, inkhelh dan kalhmang pawh a inang hle. Team pahnihin goal thun tumin an innawr a, goal chu sawi loh, goal chance pawh hmuh tur a awm meuh lo.

Minute 70-naah Tlangnuam defender Lalmuanpuia'n ṭul lo takin box pawn chiahah Eric Remruatpuia Chhangte a titlu. Venghnuai freekick hmuhna hi mual sir lam ni mah se mual dinglam aṭanga pet turin ke veilama pet thiam TS-a Zadeng an kawl.

Ball pet thiam TS-a Zadeng hian goal kilah tak a dah a, Tlangnuam keeper Lalbiakkima tan dan rual a ni lo. Venghnuaiin minute 20 chauh khelh tur a awm tawh tihin 1-0 in hma an hruai a, mipui thawm a ṭha hle.

Goal luh hnuah pawh team ṭha zawk Venghnuai an chungnung a, Laldanmawia hoa ding Venghnuai tlarhnung a khawng ṭha. Tlangnuam forward chhuanvawr Vincent Lalduhawma pawh a che thei lo a, a tawpah erawh Venghnuai an vannei.

Injury time-ah pawh minute linaah Tlangnuam forward Vincent Laltlluangzela'n box chhungah ball la lutin a cross ball chuan VL Ruata Tlangte kut a per. Tlangnuamin penalty an beisei a, amaherawhchu semifinal ang thoin Venghnuaiin VAR awm loh an vanneihpui - referee-in penalty a pe lo.

Venghnuaiin 1-0 in hnehna an chang a, a vawi khat nan CYMA Football-ah an champion. Nomawi chawi turin vanneihna mamawh mah se Bethlehem Vengthlang leh Salem Veng hnehtu an ni a, champion an phu. Player leh coaching staff te thawhrimna bakah a tawp thleng a ruahsur hnuaia, 'Venghnuai ṭang fan fan' tia au rual mipuiten fak an phu.

Tunah chuan MPL hnuhnung ber final-a Chawnpui FC hneh lotu Venghnuai mittui a hul tawh a, tunah chuan CYMA Football nen an nui tawh ang.