A vawi thum nan Swiatek a champion

Iga Swiatek chuan inkhel hmuhnawm takah Karolina Muchova hnehin French Open champion a ni leh ta. Clay court inelna lian ber Roland Garros-ah hian tun hnai kum li chhungin vawi thum ngawt hlawhtlinna a chang thei a ni.

World number 1 leh seeded pakhatna ni bawk Swiatek hian world number 43 Muchova hi 6-2, 5-7, 6-4 in a hneh a, hnehna chang tur hian darkar hnih leh minute 46 chhung hun a hmang.

Hmeichhe tennis huangah hian hnehsawh taka rorel thei an awm lohna a rei ta deuh - tunah chuan Swiatek hian Grand Slam nomawi pali a nei ta. Legend Justine Henin (2007) hnuah French Open title humhim leh thei hmasa ber a ni hial.

A awlsam lo

Paris khawpuia tennis an khelhna hmun hmingthang Court Philippe-Chatrier-ah Swiatek tan hna a awlsam vek bik lo, final khelh hma hi chuan set hloh miah loin player paruk a hneh thei.

Mahse, Muchova erawh dinhmun duhawm zawkah a ding hmasa. Set khat ve ve an lak hnuin a chak zawk chinfel a ngai, set thumnaah Muchova hian a khingpui service chhuhsakin 4-3 in hma a hruai.

Kum 22 mi Swiatek tan mahni service hum vek ringawt a tawk ta lo a, chak lo thei dinhmunah a ding. hun harsaah Polish nula a tho chhuak, a service a hloh hnuah game khat chiah hloh lehin a dang chu a la fai vek.

Swiatek chuan, "Final awlsam lo leh harsa tak chu a ni, hetiang inkhela hnehna ka chang thei hi ka lawm takzet. Kei chuan record hrang hrang an sawite hi ka bengkhawn ber lem lo.

"Ni tin mai hian a hma aia ṭha zawka khelh ka tum a, chumi tur chuan ka theihtawp ka chhuah ṭhin," a ti. French Open final a luh avang hian tun kara ranking chhuak tharah pawh number 1 a ni chhunzawm zel ang.

Clay court roreltu

Tennis khelhna hmun hi chi hrang hrang a awm. Hard court, clay court leh grass court-ah te hian ball kal dan a inang lo a, player ten hmun ṭhenkhata inkhelh an thiam êm êm laiin ṭhenkhatah chuan an harsat ṭhin.

Clay court-ah hian ball a kalmuang hret a, a sawt kang sang thung - he hmun hi hnung lam leh hla deuh aṭanga ball vaw thiamte tana hmun nuam leh inkhelh an thiamna hmun bik a ni - Swiatek tan hmun duhthusam a ni. Clay court tournament vawi 16-ah ṭum sarih a champion thei.

Ashleigh Barty chuan kum 2022 March thla khan tennis a chawlhsan thu a puang thut a, khatih laia world number 1 a chawlh takah chuan midang tan kawng zau takin a hawnsak; a hmun ruakah hian Swiatek rawn ding chhuakin tun thlengin a la chungnung.

Tun hnaiah Swiatek chauh ni loin Aryna Sabalenka leh Elena Rybakina ten an khel ṭha thei êm êm a, tournament lian French Open-ah hian Swiatek hi chesual hma ni se la chuan number 1 a nihna pawh hloh thei hial a ni.

Mahse, tunah zet chuan midang chunga leng a nihna a lantir leh thei tlat. Hmeichhe tennis player la inkhel lai zingah chuan Swiatek, Venus Williams leh Naomi Osaka te chauh hu major title pali la tling thei an awm hial.

Vanduai Muchova

Tournament ṭan a nih dawn khan Muchova hi final lut tura rinkai a ni lo. Mahse, player ṭha bik Aryna Sabalenka nen semifinal an khelh dan entute chuan final-ah pawh Swiatek a hneh theih mai an ring.

Seeded pahnihna Sabalenka nen set thumna an khelh laiin 2-5 in a hniam zawk a, mahse point hnuhnung 24 zinga 20 tehmeuh hmuin a chak let thei a, a theihna a san bakah a rilru a paukhauh bawk.

Nomawi inchuhna inkhelah a chak lo zawk ni mah se inkhel entu lam lawm a hlawh, pahnihna lawmman a dawng tur chu ding chungin zahna chibai an buk hial a, a tan chuan hun chhinchhiah tlak bik a ni ngei ang.

Czech republic nula, kum26 mi Muchova chuan, "Nomawi ka hnaih hle a, mahse a nihna takah chuan ka lak aṭangin a awmna a la hla hle thung," tiin a dinhmun a sawi a, tun dinhmunah chuan amah aiin Swiatek a ṭha zawk tih a pawm.

Muchova leh Swiatek te hi tun hma aṭanga inhre tawh, training pawh lo nei dun fo tawh an ni. Swiatek chuan a hneh tak player hi mi ṭha leh taima, a mihring mihrinna pawh a zah tak a nih thu a sawi ve bawk.