Lianzuala chanchin hi movie-ah siam rawh se - Stimac
Mizo tlangval Lallianzuala Chhangte chuan Zirtawpni zan khan India tan goal a khung a, Mongolia lakah Blue Tigers chu 2-0 in hnehna a chanpui - inkhelh zawhah India coach Igor Stimac chuan Lianzuala chanchin chu movie-a siam tlak a nih thu a sawi!
Hero Intercontinental Cup-a an match hmasa berah India tan Sahal Abdul Samad chuan minute hnihna lekah goal hmahruai a khung a, minute 14-naah Lianzuala'n a chhunzawm - goal dang lut tawh loin an match hmasa berah India an chak a, Lianzuala tan India tan match 20-a goal nga a khungna chiah a ni nghal.
Blue Tigers boss Igor Stimac chuan, "Ni tin mai hian a thawkrim êm êm ringawt mai a ni. India senior team tana khelh ve châk, ṭhangthar lo awm zel turte tana entawntlak tak a nih avangin a chanchin hi movie-a siam tlak a ni - professional ni tura thil tih ngai zawng zawng a hnen aṭang hian an zir thei ang," a ti a, Lianzuala hi hero of the match-ah thlan a ni bawk.
Player a nih laia Croatia tana vawi 53 inlan thei Stimac chuan, "Lianzuala hi Pathiannia Mumbai City tana a goal khung an hmu ṭhin a, an hmuh loh chu chumi phena ni ruk leh a chanve rim taka a thawhna chu a ni. A thawhrimna hian fak a phu a, hetianga ṭha taka a khelh reng hi ka beisei," a ti zui a, Lianzuala zunah a uai a ni ber!
Lunglei tlangval Lianzuala chuan, "Pathian awmpuina leh kaihhruaina vang liau liau a ni. Ka thil tihṭhat ve tlemtê an lo hmu ve a ni ang - hei hian tun aia thawhrim lehzual duhna min pek rualin, mawhphurhna lian tak a keng tel tih ka hria," a ti a, an Coach fakna chuan phurna a pek thu Vanglaini a hrilh - Mongolia lakah hian Lalengmawia Ralte (Apuia) chuan inkhel bul a ṭan ve bawk a ni.
India hi zanin dar 7:30-ah an inlan zui dawn a, Vanuatu nen an inkhel ang. Lianzuala chuan, "Tun inelnaa kan match hmasa ber a ni a, Mongolia laka kan khelh danah ka lawm tawk viau. Mahse, kha aia ṭha khan kan khel thei a, Vanuatu lakah a hma aia ṭhaa kan khelh ka beisei," a ti a, Mizo mipui ṭawngṭaipuina a ngen bawk.
Zirtawpni zan inkhel dangah Lebanon chuan 3-1 in Vanuatu an hneh. FIFA ranking-a 99-na Lebanon tan Nader Matar, Hassan Kourani leh Karim Darwich (penalty) ten goal khat ṭheuh an khung a, Vanuatu tana John Wohale-a goal khungin awmzia a nei phak lo.
Bhubaneswar, Odisha-a neih mek inelnaah hian team pali hi group khatah an awm ho vek a, an inkhelh kual vek hnua a sang pahnih hian final-ah nomawi an inchuh dawn a ni.