Nuggets tan nomawi a hnai ta

Denver Nuggets chuan nimin zing khan Miami Heat chu 108-95 in an luhchhuah a, basketball inelna ngaihhlut NBA champion ni turin match khat chak chauh an hmabak ta.

FTX Arena-a inkhelah Nuggets hian a tir aṭangin an khel fuh, chutihrualin quarter hmasa berah chuan point khatin an hniam zawk - a hnu lamah erawh hnung lam hawi tawh loin an dingchang.

NBA Finals best of seven series khelh turah Nuggets hian 3-1 in hma an hruai. June 13, Thawhlehni zing dar 6:00 hian anmahni khelmual Ball Arena-ah game 5 an khel dawn, an chak a nih chuan an champion tlang tawh dawn a ni.

Tun hnaia khel ṭha ṭhin tak forward Aaron Gordon chu Nuggets chakna hnar a ni leh a, ani hian point 27 a neih bakah rebound vawi sarih a la a, assist vawi ruk nei bawkin a thawhhlawk hle.

Nuggets head coach Michael Malone chuan, "Aaron khan a khel ṭha hle a, hun harsa kan tawh dawn pawh khan pasalṭha takin team khaidingtu a nihna kha a rawn lantir thei zel.

"Hnehna kan chan chhan tak erawh player zawng zawng an khelh ṭhat vang a ni. Hnehna kan chan avangin kan lawm a, chutihrualin kan hna a la zo lo a ni tih erawh kan hriat a ngai," a ti.

Inkhel tir lamah NBA Most Valuable Player vawi hnih ni tawh Nikola Jokic chu a kerek a hliam a, inkhel zui tho mah se quarter hnuhnung berah hrem a tawk leh zauh bawk - game 5 erawh a khel thei dawn.

Coach Malone chuan sawi zawmin, "Champion tur chuan vawi khat kan chak leh phawt a ngai. Ka naute hian in lamah TV en lo a, radio ngaithla loin chanchinbu pawh chhiar lo se, chu mai bakah an thian dangte nen pawh titi lo se.

"A chhan chu pawn lam aṭanga thil dang an hriat ka duh rih lo, a bik takin an khelh dan chungchangah ngaihtuah tur dang nei rih lo se ka duh a ni," tiin a naute chu ama thusawi chauh ngaithla rih turin a duh.

Seeded hniam ber ni chunga champion tum - NBA team dangin an la tih theih ngai lo tih tum bawk Miami Heat lamin mellung danglam phun tur chuan an khelh hmabakah an chak vek a ngai tawh tihna a ni.

Miami coach Erik Spoelstra chuan, "Ka naute hian tih theih loh tura ngaih tam tak an ti tawh a, hun harsa leh hrehawm pawh an paltlang hnem tawh. Hei leh chen hi mi mak tih khawpin kan kal.

"Chuvangin tunah hian kan la tlawm bik lo a, tunah pawh hian chona harsa leh huphurhawm tak chu kan koah a tla mek, chak châka tuihal leh huaisen an nih avangin theihtawpin kan bei let ang," tiin a sawi.