A zawna chak thei Hunthar

Tata SK 712 Pro-Volleyball League 2023 khelh laiah, team ṭha Hunthar chuan champion an tum ngam tih a takin an lantir zel - a zawna vawi hnih an chakna ni turin Durtlang North chu 28-30, 25-19, 25-23, 25-22 (3-1) in an hneh.

Inrinni zan R. Dengṭhuama Indoor Stadium, Mualpuia inkhelah Hunthar lamin set hmasa ber an hloh a, mahse insiamṭha zuiin a zawnin set hnuhnung pathum an la a, tawnhriat an neih ṭhat an chhawr ṭangkai hle.

Kum 2017 leh 2018 PVL champion Hunthar tan Laldensanga leh Lalnunfela te an khel ṭha a, point 16 thawk chhuaktu Densanga hi D3 Business Player of the Match atan thlan a ni a, point 21 neitu Gagandeep Singh a langsar hle bawk.

Tun season Pro Division inelna vawi hnih awm tawhah Hunthar an champion ve ve a; tualchhung volleyball inelna sang ber PVL-ah a vawi thum nan nomawi an chawi zui thei a nih chuan season duhawm bik a ni ngei ang.

Champion lai Durtlang North erawh an la che fuh hleithei lo, an match hmasa zawkah Thutak Nunpuitu Team (TNT) chu set la loin an ngam lo, match hnihnaah pawh set an lak hmasak an hum thei ta chuang lo a ni.

Johan Vanneihtluanga, Fabian Lallunghnema leh Vanlalṭanpuia ten TNT laka an khelh aiin Hunthar lakah chuan an khel ṭha zawkin a lang a, an player chah luh Anup D Costa erawhin beisei a la phak lo - point 33 ngawt nei mah se, a tihsual vanga an khingpuiin point an hmuh chu 19 tehmeuh a tling.

Durtlang North hian June 13, Thawhlehni zanah Chhinga Veng Spikers an tum dawn. June 17, Ningani zanah Hunthar hian Tuipuiral an hmachhawn ve leh thung dawn a ni.

Inrinni tlai khan hmeichhe inelna lam khelh a ni bawk. PVL an khelh hmasak berah Luangmual an mikhual lo chhunzawm hle. Luangmual hian Bethlehem Vengthlang chu 25-22, 26-24, 25-14 (3-0) in an sawp.

Haryana tleirawl Nipa Barad-i'n Luangmual tana a inlan vawi hnihnaah point 31 tehmeuh a hlawh chhuak a, ani bakah hian Lalmuanpuii (16) leh Hmingṭhazuali (6) te an khel ṭha hle bawk.

Hmeichhe team paruk inel zingah Luangmual chiah hian Mizoram pawn aṭangin player an lalut a, an chhawr ṭangkai thei hle. An match hmasa zawkah tawnhriat nei ṭha Power Department Sporting Club an hneh tawh bawk a ni.