Djokovic khelh chu a harsa - Alcaraz

French Open champion tura rinkai, world number 1 ni chunga Paris khawpui pantu Carlos Alcaraz chuan Novak Djokovic hmachhawn chu thil harsa leh hautak, taksa mai bakah rilru thlenga nghawng thei a ni tih a sawi.

Zirtawpni zan khan player ṭha pahnih hian final luh an inchuh a, khawvelin a hmuh châk inkhelah hian Alcaraz chuan beisei a phak lo, player tawnhriat nei ṭha zawk Djokovic-a'n 6-3, 5-7, 6-1, 6-1 in hnehna a chang.

Kum 20 mi Alcaraz chuan, "Novak hi chu tennis tan legend a ni a, ani hmachhawn hi chu a harsa a ni. A nihna takah chuan tun ṭuma kan inkhelh ang hian match dangah ka la awm ngai lo.

"Player dangte hian Novak an hmachhawn dawn hian, hlauh nei lo leh zam miah loa an hmachhawn theih thu an sawi a nih chuan thu dik lo a ni ang, ani hmachhawn dawn hi chuan a boruak a danglam," a ti.

A tir lamah chuan Alcaraz hi a khel ṭha viau a, mahse set thumna aṭangin a talbuai. A rilru a hah tih a hriat a, chu chuan a taksa a nghawng - set hnuhnung pahnihah phei chuan game khat ve ve chauh a la thei.

Grand Slam vawi 22 champion tawh Djokovic chuan, "Kan inkhel khan tharum a heh ngar ngar hle, ka tan pawh thil harsa leh hautak a tam takzet. Alcaraz khan theihna a nei, nakinah chuan French Open nomawi hi vawi khat aia tam a la chawi ngei ang," a ti.

Semifinal lehlamah Casper Ruud chuan Alexander Zverev hnehin final a lut ve bawk a, nizan khan Djokovic leh Ruud te hian nomawi an inchuh zui nghal a, inkhel result erawh kan hre hman lo.

A vawi 34 nana Grand Slam final kheltu Djokovic hi a chak a nih chuan, major title lak hnem lamah Rafael Nadal nen record inṭawm an neih (22 titles) a khum ang - season hmasa finalist Ruud erawh Grand Slam la champion ngai lo a ni thung.