Villa pan tur Tielemans

Aston Villa chuan Leicester midfielder Youri Tielemans an la dawn - Foxes tana a contract neih lai hi June thla tawp rualin a zo dawn a, thla thar ni 1 aṭangin Villa player a ni ang.

Premier League aṭangin Leicester City an tla a, kum 26 mi Tielemans hi club ṭhenkhat nen pawh sawizawm a ni. Arsenal, Manchester United leh AS Roma te hming hial pawh a ri, mahse a tawpah chuan Villa Park a pan dawn.

Tielemans hian Jan-uary, 2019 khan Leicester City hi loan hmangin a zawm - July thlaah a nghetin an lei a, an lak nghehna hi pound maktaduai 40 zet niin an club player man to ber a ni hial.

Kum 2021 FA Cup-ah a champion pui. Wembley Stadium-a Chelsea nen nomawi an inchuh ṭum khan Belgium international hian goal awmchhun a khung, 1-0 a chakin nomawi an chawi.

May thla khan Tielemans hian instagram lamah video dah chhuakin Foxes ṭantute a lo mangṭha fel tawh a, a chunga an ṭhatna avanga a lawmthu a sawi tel bawk a ni.