Hnehna changtu Amanda Nunes a chawl ta

Mi tam takin hmeichhe mixed martial artist ropui ber ang hiala an chhal Amanda Nunes chuan UFC 289-ah harsatna nei loin Irene Aldana a hneh a, UFC Women's Bantamweight title a kawl lai chu a humhim.

Mahse, Nunes hian fight hmachhawn chhunzawm zel a tum tawh lo a, bantamweight title bakah hian featherweight title a kawl lai chu kalsanin MMA a chawlhsan thu a puang - kum 35 mi a nih ve tawh avangin fight hmachhawn chhunzawm zel a tum tawh lo.

Rogers Arena, Vancouver, Canada-a a fight hnuhnung berah Brazilian fighter hian unanimous decision (50–44, 50–44, 50–43) hmangin hnehna a chang a, MMA-a fight vawi 28 a hmachhawna vawi 23 a chakna a ni - vawi nga tlawm a nei bawk.

Nunes chuan a kawnghren kawl lai pahnih chu chhuatah dahin, a chawlh thu hi a puang a, "Zanin hi ka tan chuan chawlhna tura hun duhthusam a ni," a ti a, a kut tum hum ruh a tum tawh lo.

UFC-a hmeichhe fighter zinga title pahnih kawl thei awmchhun Nunes chuan, "Ka nu hian chawl tura min duhna hi a rei tawh a, fight ka hmachhawn reng hi hmuh hrehawm a ti. Ka hlawhtlinna lo chan tawh zawng zawngte hi hlim taka chen ve ka duh tawh a, ka chhungte nena zinkual ka châk a ni," a ti.

Nunes chuan a hringnun thawnthu thlirkirin, "Ka beiseinate tihlawhtling tur pawha naupang mai ka la nih lai khan Brazil-a ka chhungte chu ka kalsan a, champion meuh hi chu ka nih ka ring ngai lo.

"Mahse, champion ka nih meuh kha chuan ka tan awih pawh a harsa tawh zawk. Brazil-a khawpui tê tak tê, tu khawkhain a awmna an hriat loh aṭangin ka lokal a, champion hial ka ni thei. Tunah chuan ka kal dawn ta, ka lawm êm êm e," tiin MMA khawvel chu a mangṭha.

Nunes hian MMA khawvela hming langsar tak tak Cris Cyborg, Ronda Rousey leh Valentina Shevchenko te a lo hneh tawh a, UFC 289-ah hian Julianna Peña nen a vawi thum nana inhmachhawn tura tih ni mah se, Pena hi thla hmasa lawk khan hliam vangin a inhnukdawk.

Pena aiah Aldana a inlan a, harsatna nei loin a hneh zui. Nunes hian Peña hi December 2021 khan an in fight hmasak berah a ngam lo a, mahse, July 2022 khan a hneh let - a tawpah beisei angin an in fight ta lo a, UFC fans tam tak chuan an ui khawp ang.