Premier League aṭanga tla Leeds United-in neitu thar nei

Leeds United chairman Andrea Radrizzani chuan Premier League aṭanga an tlak hnu lawkah theihtawp an chhuah chhunzawm tur thu sawi mah se, English club-a a share zawng zawng hralh a remti.

Italian sumdawng hausa Radrizzani hian Leeds-ah hian 56% share a la nei mek a, hei hi Leeds-a 44% share nei mek 49ers Enterprises hnenah pound maktaduai 170-in hralh a rem ti a ni - he thuziak i chhiar meuh chuan an inleifel tawh hial mai thei.

Season thar aṭanga Championship khel tur club chuan thuchhuah siamin, "Leeds United chuan Aser Ventures leh 49ers Enterprises te chu club lei turin an inrem tih kan tichiang e. Inremna angin tihfel ngai te tihfel mek a ni a, thuthar dang chu kan inhriattir zel dawn nia.

"Tunah chuan Premier League lama kir leh thuai dan chauh kan ngaihtuah a ni," an ti a, English top flight league-a an kir leh theihna turin 49ers Enterprises chuan theihtawp an chhuah chhunzawm tur thu an sawi.

Radrizzani & Leeds

Kum 48 mi Radrizzani hian kum 2017 khan Leeds hi pound maktaduai 45-in a lei a, mahse, a share hi a hralh ṭhen zel avangin tuna a share a hralh leh meuh chuan 56% chiah hralh tur a nei tawh a ni.

American football team San Francisco 49ers neitu 49ers Enterprises hian kum 2018 khan Leeds-ah hian 15% share an lei a, kum 2021 khan 44% ah tipung chhoin, tunah chuan a puma neitu an ni dawn ta.

Aser Ventures kaltlanga Leeds neitu Radrizzani leh a thawhpui sa 49ers Enterprises te hi season tawp hma daih khan an lo indawr tawh a, inremna sa ang chuan Premier League-a inhamtan leh tan lohin nghawng a nei tura tih a ni.

Division hniam lamah Leeds an tla ta ngei a, inbiakna chhunzawm niin, Premier League-ah inhamtang se, £400mtd vela inrem tur kha £170mtd-in an inrem ta zawk.

Mangṭha Radrizzani

Radrizzani-a'n Leeds a lei hnua a hnathawh ṭhat bera chhal theih chu coach atana Marcelo Bielsa a lalut kha a ni a, Argentine coach hi Leeds chanchina coach hlawh hnem ber ni turin a thlem lut.

Coach thawkrim tak Bielsa hian kum hnih chhung atan Elland Road-ah hian contract a ziak a, kum khat dang pawhsei theih tura tih a ni - Bielsa hian 2019-20 season khan Championship-ah nomawi chawipuiin, Premier League-ah an kir.

Kum 16 zet Premier League khel lo tawh Leeds tan Bielsa hnathawh a ropui a, Leeds khawpuia kawngpui pakhat chu 'Marcelo Bielsa Way' tiin a hming an phuah hial - Leeds fan-te hian club neitu Radrizzani thlengin an ngainat phah a, Premier League an kir thei chu an hlim hle.

Mahse, February 2022 khan Radrizzani-a'n football nunrawnna pholangin, Premier League table-a 16-na an nih mek laiin Bielsa chu a hna aṭangin a chawlhtir a, heta ṭang hian Radrizzani leh fan te boruak a ṭha lo ṭan.

Chhuak mai la

Radrizzani-a'n thutlukna a siam fuh lo - Bielsa a ban kumah Premier League-ah inhamtang mah se, tun season-ah erawh an inhamtang zo ta lo a, Championship lama an tlak hnu lawkah Leeds ṭantute chuan Italian sumdawng hi an club chhuahsan tura an duhna thu an tlangaupui nghal.

Leeds United Supporters Club chuan thuchhuah siamin, "Leeds United-a neitu ni reng turin a tlin tawh lo. A nungchang leh khawsakphung tam tak hi a mak a, he club-a lawm hlawh leh ngai reng reng tawh lo turin hun a hmang a ni," an ti!

An duhtawk mai lo - Leeds ṭantute chuan, "A chhuah hma poh leh a ṭha a ni mai a, 49ers Enterprises-in kan club lei an duhna hi pawm ngei a ṭha. Club-a a hmingchhe tak tur pumpelh nana a tihtheih chu, a rang lama club leh stadium hralh a ni," an ti a, an dim lo.

Leeds fan-te hian Tottenham Hotspur nena an match hnuhnung berah khan Radrizzani hi chhuak turin an lo au rual tawh bawk - football erawh chawlhsan a tum lo. Leeds a hralh hma hian Serie A aṭanga Serie B-a tla hlim Sampdoria chu a thawhpuite nen an lei a ni.