Novak Djokovic tan Grand Slam nomawi 23; A chunga leng tumah reng an awm lo

" Kei chuan thawnthu hran ka ziak ve a ni mai a, player ropui ber chungchanga inhnialna leh sawi hona hi chu midang kutah ka dah. Player ropui ber tiin ka inchhal ngai lo a, hei chu midangin an lo teh tur zawk niah ka ngai.

Kum chu number mai a ni tiin a sawi ṭhin a, keima lamah chuan hei hi a dikna chen pawh a awm, dik zel se pawh ka ti hle. Amaherawhchu, kum hian ken tel tam tak a nei a, tun hma kum 10 liam ta ai kha chuan ka hahdam har a, natna ka nei tam zawk ta bawk.

Roger leh Rafa te hi ka elpui leh ropui ber te an ni a, anni pahnih lak aṭang hian thil tam tak ka zir chhuak chiang hle. Tun hnai kum 15 chhung chu kawng hrang hrangin kan inbei a, hetiang dinhmun ka thlen theih nan min chhertu an ni.

Tunah hian ka zinkawng hi a la zo lo a, ka la zawh tawp loah ka ngai. Chona leh phurna ka neih chhung chuan tennis ka khel peih ang. A bik takin inelna lian Grand Slam atan rilru ka sawrbing dawn.

Wimbledon khelh ngei ka tum e..."
- Novak Djokovic

Player ṭha, ropui leh danglam bik a nihna chu Novak Djokovic-a'n a lantir a, mipa tennis player piang tawh zinga ani aia Grand Slam champion hnem an la awm ngai lo. A chung berah a awm ta vang mai a, midang tan tluk a harsa tawh hle ang.

Pathianni zan khan French Open 2023 khelh zawh niin, seeded pathumna Djokovic hian a khingpui Casper Ruud chu 7-6 (7-1), 6-3, 7-5 in a hneh a, inelna lian bik Grand Slam nomawi 23 zet a khawl khawm ta - Rafael Nadal (22 titles) chungah a awm.

Australian Open (10), French Open (3), Wimbledon (7) leh US Open (3) te a khawl khawm ta. Mipa tennis player zingah Grand Slam palia vawi thum champion kim thei awmchhun a ni nghal bawk, a sulhnu hi a nep lo hle.

Mipa zingah a chungnung ber a, hmeichhe player nena chhiar khawm erawh chuan vawi 23 champion tawh Serena Williams a nihrual chiah, an chungah hian vawi 24 champion tawh Margaret Court-i a la awm - zawimuangin Djokovic hian a la khum zo vek tho mai thei.

A chungnung

Roger Federer leh Rafael Nadal te hunlaiin a rawn chawr chhuak a, a tir lamah chuan tharum a ngah tawk loh avangin a tan kawng a inhawng zau dawn lo niin a lang hman a, chutihrualin a rilru paukhauhna leh a thiamna erawh engtik lai mahin dah hniam theih a ni ngai lo.

Player ropui pahnih inelna turu tak karah pawh zawimuangin a kal ve zel a, kum 2021 a rawn herchhuah meuh chuan Federer leh Nadal te angin Grand Slam nomawi 20 a kawl tling ve ta reng mai a, kum naupang ber a nih avangin hmabak a eng zui viau.

Mahse, thil a awlsam vek bik lo. Covid-19 laka invenna vaccine a la duh tlat lo a, hei vang hian Australian Open a khel thei lo zui a, a inkhelh thiamna hmunah hian Nadal a champion a, Spanish star hian a vawi 14 nan Roland Garros title a la zui bawk.

Nadal a chungnung chho viau dawna a lan laiin Djokovic tan hun ṭha a inher chhuak ve leh ta zawk a, tun hnai Grand Slam hnuhnung pali zinga pathumah a champion fai vek - Paris khawpuia inelna bikah hian Nadal chu hliam vangin a inlan thei lo.

Nadal a inhnuhdawh chiah khan Djokovic hi champion tura rinkai a ni nghal, world number 1 ni chunga inelna tir lam hmachawntu Alcaraz kha a tan a la patuai hret a, final boruak sangah khan a tir lamah talbuai ve deuh mah se a buai chhunzawm lo a ni.

Hmabak chu

Tunah June thlatir a ni a, thla thar tir aṭangin grass court inelna lian Wimbledon khelh ṭan a ni leh nghal dawn. Djokovic hi kum 36 mi a ni tawh, tournament zawng zawng khel tur leh ṭha taka inlan reng tur chuan beisei chi a ni tawh bik lo ang.

Chutihrualin, Wimbledon khelh hmain tournament lian lo pakhat emaw chu a khel ngeiin a rinawm a, inelna lianah hian a champion leh a nih chuan Serena-i kalsanin major title ngah ber Court-i meuh pawh a nih rual thei dawn.

Wimbledon hi Djokovic tan hmun ṭha a ni, champion hnem ber leh British mite ngaihzawn rawn Roger Federer pawh kha vawi riat champion a ni a, kuminah Djokovic hi a champion leh thei a nih chuan Swiss legend hi a nih rual der dawn bawk.

French Open champion ni chung ngei maiin record inṭawm a chelhpui Nadal a kalsan a, grass court-a inkhel thiam hmingthang Federer ngei pawh a vanglaia a tualchaina leh a lal lenna hmunah ngei mai a ropuina ang a neihsak ve thei dawn niin a lang.

Federer a chawl tawh a, hliam vangin Nadal a chawl mek - a inkhel leh a nih pawhin season thar bak a khel dawn tawh lo. A elpui pahnihte chungah Djokovic hian awmhmun a sawhnghet viau thei dawn niin a lang, chutihrualin hliam leh harsatna dang erawh thleng thei a ni ve bawk.

Number 1 Djokovic

Mipa tennis thuneitu sang Association of Tennis Professionals (ATP) lamin world ranking an siam tharah chuan Novak Djokovic hi a chung berah a awm leh ta a, number 1 ni rei thei ber a nihna pawh a sawhnghet zual zel.

Semifinal-ah Carlos Alcaraz a hneh khan a khingpui a hneh a ni satliah lo a, a ranking a chhuhsak tel chhunzawm nghal. Casper Ruud hneh zui lehin, tunah hian Djokovic hi point 420-in an sang fal ta chiah.

February thla khan Djokovic hian Stefanie Graf-i record, chawlhkar 377 chhung world number 1 nihna chu a lo khum tawh a, a hnuah ranking tlak hniam lai nei leh mah se tunah chuang a chung berah bawk a lawn leh ta a ni.

Number 1 nih an ngai pawimawh a, hei bakah hian ranking sang ber ni chunga season tawp hman an duh ṭhin. Serbian star hian vawi sarih (2011, 2012, 2014, 2015, 2018, 2020, 2021) chu number 1 ni chungin kum tawp a hmang tawh, kuminah a awm leh a nih pawhin a mak lo ang.

Lawmpuitu Rafael Nadal

Novak Djokovic-a'n French Open nomawi chawiin mellung ropui bik a phun a, hlawhtlinna a chan rual chiah hian Grand Slam nomawi chawi hnem lama a tlukpui ni ṭhin, tuna a khum tak Rafael Nadal chuan lawmpuina thu a rawn ziak nghal.

Spanish star Nadal chuan, "I hlawhtlinna ropui tak avangin ka lawmpui takzet che. Tun hma deuh kha chuan '23' hi number mai a ni a, ngaihtuah phak pawh a ni lo, mahse i hlen chhuak miau si! I hlawhtlinna kha i chhungte leh in team ho khan lawm rawh u," tiin Twitter lamah a ziak.

Nadal leh Djokovic te hi Grand Slam final bikah an lo intawng fo tawh - Nadal hian vawi nga a hneh a, vawi vawi li chu Djokovic hi a chak zawkah a ṭang ve thung, an pahnih chauh pawhin major final-ah ṭum kua an inkhel tihna a ni.

Semifinal-a a hneh tak Carlos Alcaraz pawhin lawmpuina thu sawiin, "I nomawi chawi leh record thar avangin ka lawmpui che," a ti. Grand Slam vawi 12 champion Billie Jean King pawhin lawmpuina bakah duhsakna thu a sawi chhuak ve bawk.