Cricket khawvel awptu Australia

Australia hun a ral tawhah ngai mah se cricket khawvelah chuan a sa sehah Aussies danglamna a lang leh ṭhin. World Test Championship final 2023-ah Pat Cummins kaihhruai Aussies-in India chu 209 runs-in an hneh.

Inelna hi Oval, England-ah June 7-11, 2023 chhung khan neih a ni a, Australia-in bul an ṭan ṭha a, a tawp an khar ṭha bawk. Australia hian tun dinhmunah Cricket World Cup, T20 World Cup, Champions Trophy leh World Test Championship nomawi an kawl vek.

Head leh Smith

Ṭhumvawrah India an chak a, Rohit Sharma-a'n vawm hmasak a thlang. Australia opener Usman Khawaja chuan run khat pawh a siam lo a, a kawppui David Warner-a'n 43 runs a siam thung.

Aussies middle order Steve Smith leh Travis Head te an che ṭha a, century an siam ve ve. Smith hian 121 runs siamin Head hian 163 runs a siam bawk a, dinhmun ṭha takah Australia an ding.

First innings-ah Australia hian 469 runs an siam a, India an bat ve hma hauhin dinhmun ṭha takah an ding. Chutihrualin Test cricket-ah chuan ni nga chhunga chak zawk an awm lo a nih chuan an la inhnehtawk thei a, India tan draw tal beiseina tur a la awm.

Thlawptu nei lo Rahane

IPL-a hming langsar Shubman Gill leh captain Rohit Sharma ten bul an ṭan a, beisei angin bul an ṭan lo. Sharma (15), Gill (13), Cheteshwar Pujara (14) leh Virat Kohli (14) ten run 20 an siam tling lo.

Ajinkya Rahane-a'n 89 runs siam ve bawk mah se thlawptu a nei ṭha lo a, Shardul Thakur-a'n 51 runs siam ve bawkin India-in first innings-ah 296 runs an tlin hram.

Australia dinhmun a ṭha leh sawt a, India tana target harsa tur chin chhawpsak zawha duhtawk chu an hna a ni. Aussies-in an tum an chiang bawk a, ni linaah 270 runs siamin wicket pariat an hloh tihin an duh tawk. Australia tan hian Alex Carey-a'n thi loin 66 runs a siam a, Marnus Labuschagne (41) leh Mithcell Starc (41) ten an thlawp ṭha bawk.

Aussies an dingchang

Australia-in India target atan 444 runs an chhawpsak a, Rohit Sharma leh a hote tan huphurhawm tham a tling. Gill-a'n 18 runs bak a siam lo a, Rohit-a'n 43 runs siam mah se a tam tawk lo. Cheteshwar Pujara pawhin 27 runs chauh a siam.

Virat Kohli chungah India mipui an innghat a, mahse Kohli pawhin 49 runs bak a siam lo. Ajinkya Rahane-a'n 46 runs siam leh a, all rounder Ravindra Jadeja-a'n run khat pawh a siam lo.

Ṭum dang ang thoin tail ender-te innghahna tlak a ni lo a, India-in 234 runs chauh an siam a, an target chu 209 runs-in an pha lo. Australia-in hnehna an chang a, a vawi khat nan World Test Championship nomawi an chawi.

WTC hi a vawi hnihna chauh a ni a, inelna hmasa zawkah India-in final thlengin final-ah New Zealand an hneh lo. Australia erawh an vawi khat final thlennaah an champion nghal.