Ranieri ‘magic’ a la bo lo - Serie A khel turin Cagliari a hruai kir

Premier League-a Leicester City champion puitu Claudio Ranieri-a'n kum 71-ah pawh a thiam a la theihnghilh lo a, football thawnthu ngaihnawm a ziah chhunzawm zel.

Italian coach hian Serie A khel turin Cagliari chu Italian top flight league-ah a kaipui a, season hmasa lawka relegate team hi Serie A khel turin a hruai kir lehnghal - a hnathawh hi hriatreng a ni tawh ang.

Cagliari hian Serie A khel tur hian playoff final-ah Bari chu Pathianni zan khan 1-0 in an hneh a, Leonardo Pavoletti chuan Cagliari tan inkhela goal awmchhun hi a khung.

Team pahnih hi first leg-ah 1-1 in an inhnehtawk a, Ranieri team hian tlang turin Bari khelmual Stadio San Nicola-ah chak an mamawh tih an hria - hun pek belh minute linaah Pavoletti chuan inkhela goal awmchhun a khung a, Cagliari an chak.

Magic chu!

Cagliari hi season hmasa Serie A-ah khan 18-na niin, Serie B lamah an tla thla a, season thara kir lehnghal ngei tumin coach atan Fabio Liverani an lalut - mahse, December 20, 2022 khan Palermo laka 2-1 a an tlawm hnuin Liverani hi an ban a, table-ah 14-na an ni.

Serie A kir duh Calgiari-in mi pakhat an hre chhuak a, a hming chu Ranieri a ni. Italian coach hlui hian 1988-1991 inkar kha Serie B club hi a lo enkawl tawh a, season zawna promotion hmuhpuiin, Serie C aṭangin Serie A a hruai thleng!

Cagliari-in Ranieri an bia a, January 2022-a Watford-in an ban hnua club la nei leh lo coach hian a club hlui sawmna hi lawm takin a pawm - January, 2023 aṭangin a hna a ṭan a, league round an khelh zawh meuh chuan table-ah pangana an ni phak.

Serie B-ah hian team 20 inelin, a sang pahnih chu Serie A khel turin an tling nghal ṭhin a, pathumna leh palina chuan playoff semifinal lut nghalin, pangana aṭanga pariatna ten playoff preliminary round an khel phawt zel.

A tawpah Ranieri

Ranieri-a'n Cagliari a enkawl tirh ngaihtuahin, Serie A inpetkai zo ta lo pawh ni se, a awm ngawih ngawih. Mahse, Italian coach erawh hetah ringawt hian a lungawi ve lo.

Chelsea leh Juventus pawh lo enkawl tawhtu coach hian preliminary round-ah a team chakpuiin, Venezia chu 2-1 in an hneh a, semifinal an lut - semifinal hi double leg-a khelh a ni a, Cagliari hian Parma hnehin final an lut.

Gianluigi Buffon hoa inlan Parma hi first leg-ah 3-2 in an hneh a, second leg-ah 0-0 in inhnehtawk mah se first leg-a an goal khung chhawr ṭangkaiin an tlang - final first leg-ah Cagliari mualah inkhelin 1-1 in an inhnehtawk.

Cagliari tan Bari khelmualah chak a harsa dawn tih a chiang a, Bari hi dinhmun ṭha zawk an ni - mahse, hun pek belh minute linaah Italy tana vawi khat inlan ve tawh Pavoletti chuan chakna goal a khung a, Ranieri team-ten Serie A an khel dawn ta.

Mittui nen

Inkhel tawpna hamrik ham a nih rualin mittui nen Ranieri-a'n an chak a lawm a, Italian coach tan chuan hlawhtlinna hlu bik a ni. Fiorentina boss hlui chuan, "Cagliari hian thil tam tak min pe a, vawiina coach puitlinga min chhertu an ni a, ka thinlung neitu an ni," a ti.

Ranieri chuan sawi zawmin, "He hmuna lo kir leh hi ka zuam lo a, kan hun tawn duhawm takte kha ka thaireh zo ang tih ka hlau zawk. Mahse, Gigi Riva (Cagliari player ropui) thusawi pakhat ka hre chhuak zawk a, Cagliari sawmna pawm loh kha a hmasial thlakin ka hre ta a ni," a ti a, a club pui tura kir a nih thu a sawi.

Italian coach chuan Cagliari result a ngaihven reng ṭhin thu sawiin, "An tlawm apiangin ka thinlung hi a lo na ṭhin a, hliam na tak ang mai a ni. He club tana ka rilru puthmang hi chu a danglam bik - Premier League champion kan nih pawh khan, he club bawk hi ka rilru luahtu chu a ni.

"Sardinia-a min hruaikirtu zawng zawngte chungah lawmthu ka sawi. Stadium-a kan inkhel ena lokal te chauh ni lo, a tawp thlenga min ṭantu mipuite chungah lawmthu ka sawi. Heti taka club hmangaihtute tana hlimna ka thlen thei hi ka lawm hle a ni," a ti a, a club tana a hlawhtlinna chu a ngaihlu hle.