UCL Player of the Season Rodri
UEFA Champions League Player of the Season atan final-a goal awmchhun khungtu Manchester City midfielder Rodri an thlang. Kum 26 mi Rodri hian season ṭha tak a hmang a, champion kalkawngah goal hnih khungin team tan player pawimawh a ni.
Spanish midfielder hian match 12 a khel a, assist nei lo mah se team tana a ṭangkaina a nep phah lo. Rodri hi khingpuite goal nawr tur dang chattu a ni a, tun dinhmuna khawvela defensive midfielder ṭha ber ang hiala sawi a ni.
Rodri hian Player of the Season hi a phu theihna lai a tam a, chutihrualin Erling Haaland-a'n a dawng lo erawh mak tih a hlawh hle. Football pundit ṭhenkhat thlirnaah chuan Lionel Messi-a'n Ballon d'Or a dawn theih nana kawng sial nan Haaland aiah Rodri hi thlan a ni a, hei erawh thuthang leng vak vel mai mai a ni thung.
Young player of the year atan Napoli winger Khvicha Kvaratskhelia thlan a ni a, kum 22 mi Georgian winger hian season ṭha bik a hmang. Kvara hian Napoli hi UCL final thlenpui lo mah se Serie A lamah kum 1990 hnua a vawi khat nan a champion pui a, hming lem atan Diego Maradona hming chawiin 'Kvaradona' phuah a ni. UCL bikah Kvara hian match kua khelin goal hnih a khung a, assist vawi li a nei bawk.
Team of the Season-ah Man City-in player pasarih ngawt an thawh a, finalist Inter Milan-in player pahnih chauh an thawh. Final-a che ṭha Inter keeper Andre Onana a tel phak loh laiin Real Madrid keeper Thibaut Courtois a tel thung a, Los Blancos hian Vinicius Junior an thawh bawk. PSG an thlen san miau loh avangin Kylian Mbappe leh Lionel Messi tan hmun a awm lo.
Player of the Season: Rodri, Manchester City
Young Player of the Season: Khvicha Kvaratskhelia, Napoli
Team of the Season
Goalkeeper: Thibaut Courtois (Real Madrid)
Defenders: Kyle Walker (Man City), Rúben Dias (Man City), Alessandro Bastoni (Inter), Federico Dimarco (Inter)
Midfielders: John Stones (Man City), Kevin De Bruyne (Man City), Rodri (Man City)
Forwards: Bernardo Silva (Man City), Erling Haaland (Man City), Vinícius Júnior (Real Madrid)