Liverpool inthuam chak zel an tum

Season thara Champions League khel lo tur Liverpool chuan Borussia Monchengladbach midfielder Manu Kone leh Nice star Kephren Thuram chu an dawr ṭan niin khawthlang media te chuan an tarlang a, Alexis Mac Allister-ah duhtawk mai an tum lo.

Reds hian Brighton & Hove Albion aṭangin midfielder Mac Allister hi pound maktaduai 35-in an lalut tawh a, a khelh ṭhat dan a zira a man hi pound maktaduai 55-a sang chho thei tur a ni - world champion team-a player pawimawh ni phak lei nan chuan a tlawm hle.

Transfer bazar-a uchuak taka sum sen duh lo Liverpool hian Kone leh Thuram pawh hi uchuak taka an man chhiar a nih chuan lak an tum lui dawn lem lo nia sawi a ni a, hlawh atana an phut zatin thui tak a hril bawk ang.

Khawthlang media-ten an tarlan dan chuan Kone hi £35mtd man tura ngaih a ni a, Thuram erawh Kone ai hian a man a to hret dawn niin an tarlang bawk - French midfielder pahnih hi Reds hian an lakluh theih chuan squad chu an tichhah khawpin a rinawm.

Kum 22 mi Kone hian season hman zawh takah khan Gladbach tan match 31 khelin goal khat a khung a, assist vawi khat a nei bawk. Kum 22 mi Thuram hian season hman zawh takah khan Ligue 1 club Nice tan match 48 khela goal hnih khungin, assist vawi riat a nei thung.

Reds hian centre back thar pawh lei an tum nia sawi a ni a, mahse, Liverpool hian a ruk thei ang bera an kalpui avangin tu ber nge an rim, hriat a harsa hle. Journalist rintlak Fabrizio Romano tarlan dan chuan Klopp leh sporting director thar Jorg Schmadtke te chu centre back thar lalut tur hian rim takin an thawk mek a, ke vei lam hman thiam an duh kher nia sawi a ni.