An ramah Bagnaia a tlan chak ber

Pathianni zana tlan zawh tak Italian Grand Prix-ah tualchhung tlangval Francesco Bagnaia a tlan chak ber. Ducati rider hian championship hmahruaitu a nihna chu a sawhnghet chhunzawm nghal bawk.

Season danga an la tih ngai loh ang takin kumin aṭangin 'Sprint Race' a awm a, inelna a nih nghal avangin Inrinnia an tlanah hian point hmuh theih a ni - hetah pawh hian Bagnaia a chak a, qualifying a tlan ṭhat avangin inelna takah pawh a hmasa ber aṭangin a tlan ṭan.

Kumina intlansiak an neih tawh chinah Bagnaia hi vawi thum a chak tling ta chiah - Italian GP hma khan Portugal leh Spain ramah te pawh hnehna a lo chang tawh, tun ṭumah hian championship lama amah hnaih bertu Marco Bezzecchi chu pariatnaah a thleng thung.

Kum 26 mi Bagnaia chuan, "Tun hma aṭanga ka thil sawi leh chetzia te hrechiangtu chuan, ka elpui chu midang ni loin keimah zel ka ni tih an hria ang, a hma aia ṭha zawka tih zel tumin keimah leh keimah ka inel ṭhin.

"Jorge khan min nawr na hle a, engtik lai maha inthlahdah thei loin min siam. Intlansiak ka hmachhawn danah khan 100%-in ka ti ṭha tawkah ka ngai, a chhan chu tihsual pakhat pawh nei zeuh ila chuan pakhatna ka ni thei lo ang," a ti.

Mugello tlankawngah hian Jorge Martin chu pahnihna niin, a hnungah Johann Zarco a thleng thungh - a hmasa pathumah Ducati bike khalhtu vek an thleng tihna a ni a, team dang tan dawhsana din a rem ve lo.

Lap 18 tlan hmabak an la neihah Marc Marquez a chesual, bike intlansiakna sang bera vawi ruk champion tawh hian a dinhmunah a lawm lo tih a chezia hmangin a lantir, tun hnaiah Repsol Honda nen an boruak a ṭhat thu sawi mah se tun hma nen chuan a inang thei rih lo.

Bike intlansiakna sang ber hi June 18, Pathianni tlai dar 5:30 hian Sachsenring tlankawngah Germany Grand Prix an tlan leh ang.