Serie A-ah Hellas Verona an cham zel dawn

Hellas Verona chuan Serie A khelh chhunzawm zel an duh tih thiltih hmangin an lantir a, Pathianni zan khan relegation playoff match-ah Spezia chu 3-1 in an hneh - Spezia erawh an tlawm avangin season thar aṭang chuan Serie B an khelh a ṭul dawn.

Verona tana minute ngana leka Marco David Faraoni goal hmahruai khung chu Spezia tan Ethan Ampadu chuan minute 15-naah a sut a, mahse, Chelsea aṭanga loan-a Spezia-a khel Ampadu goal khung hian awmzia a nei rei lo.

Serie A-a inhamtan duh Verona tan Cyril Ngonge chuan goal hnih khungin, chawlhlawk an hman meuh chuan 3-1 a ni der tawh. Spezia hian second half-ah 'comeback' theihna chance a nei.

Verona defender Marco Davide Faraoni chuan goal line aṭanga ball a lo hnekchhuah avangin hnawhchhuah a ni a, penalty a chawi bawk - hetihlai hian minute 68 chauh a la ni a, Spezia tan chance a la ṭha hle.

Mahse, M’Bala Nzola chuan penalty hi goal-ah a chantir thei lo a, hun tawp thlenga goal dang an khung theih bawk si loh avangin 3-1 in an tlawm a, Serie A an mangṭha.

Tun season aṭangin Serie A-ah hian relegation playoff khelh ṭan a ni - league round-ah team-te an point hmuh zat a inang chuan playoff hmanga an dinhmun chinfel tura tih a ni a, Verona leh Spezia hian point 31 ve ve an nei.

Dan thar angin team pahnih hian relegation playoff hi an khel a, a tawpah chuan Verona an chak a, Italian top flight league an khelh chhunzawm dawn.