West Ham-ah Moyes a cham dawn

Europa Conference League-a West Ham United champion puitu David Moyes-a'n club dang chhuahsan a tum lo a, Hammers-ah a cham dawn. Season hman zawn takah khan hun tam zawkah Moyes hi chhuak tura sawi a ni a, ṭum thum zet chu ban thei dinhmunah a ding.

Amaherawhchu, Moyes hian ban thei dinhmuna a dinna match thumah hnehna a chang vek a, Premier League match hnih khelh tur la awmin Hammers chu hmun himah a dah bawk.

West Ham hruaitute lawmna belhchhah turin Moyes-a hote hian Prague-ah Fiorentina hnehin kum 43 hnuah Hammers chu nomawi lian tham a chawipui. Season tharah Moyes-a hoin Hammers-in Europa League an khel dawn a, amaherawhchu Conference League an chawmpion theihna tura player pawimawh Declan Rice erawh a awm ve tawh lo ang.