Grass-ah Murray a champion

Andy Murray chuan Jurij Rodionov 6-3, 6-2 a hnehin Surbiton Trophy a la. Hliam leh harsatna hrang hrangin a tlakbuak hnua champion leh a ni a, grass bikah phei chuan kum sarih hnuah nomawi a chawi ve lehna chiah a ni.

British tlangval Murray hian clay court season a hmang lo. A vanglai pawhin clay-ah a hlawhtling tehchiam lo, chuvangin July thlatira khelh tur Wimbledon inbuatsaihna lo neih lawk a duh zawk.

Player ṭha leh langsar ten French Open an khel vek a, hetih lai hian Surbiton Trophy hi hmun hranah an lo khel ve bawk a ni. Kum 36 mi Murray tan chuan hlawhtlina chan hi a hlu, beiseina siamsaktu a ni nghal bawk ang.

World number 1 hlui Murray chuan, "Thutlukna ka siam sual loah ka ngai, ka nuna ni hlimawm tak pakhat chu a ni chiang hle," a ti, a nupui fanaute chuan hrilh lawk loin Murray hi a inkhelhna hmunah an ṭawiawm a ni.