U20 World Cup champion Uruguay

Uruguay chuan kum 20 hnuai lama football khel thiam ber ram ni turin Italy chu FIFA Under-20 World Cup final-ah 1-0 in an hneh a, champion nomawi an chawi.

Estadio Unico Diego Armando Maradona khelmuala final inkhelah Uruguay tan Luciano Rodriguez chuan minute 86-naah chakna goal a khung a, Italy tan si phurh sut turin hun a tam tawk tawh lo.

Rodriguez chuan, "A mak takzet, a mak takzet a ni. Kan mumang ramah kan cheng mek a nih hi," tiin an champion chungchang chu a sawi a, a hlim hle.

Italy coach Carmine Nunziata chuan khelmual ṭha tawk lo a chhuanlam a, hetihrual hian Uruguay a fak loh phah lo. Nunziata chuan, "Tournament duhawm tak kan hmang a, zanin match khan chu chu a thaibo thei lo.

"Zaninah erawh keini aiin Uruguay kha an ṭha zawk a ni," a ti. Hetihlai hian pathumna inchuh inkhelah a vawi khat nana FIFA U20 World Cup-a inlan Israel chuan 3-1 in South Korea an hneh.

FIFA U20 World Cup hi kum 2021 khan khelh tura tih a ni a, Indonesia thlen tur a ni. Mahse, Covid-19 vangin a khelh hun hi kum 2023 atan sawn a ni a, Indonesia hi thleng tura tih an la ni tho.

Mahse, Indonesia hian Israel mikhual an duh loh avangin FIFA chuan March 2023 khan Indonesia hi World Cup an thlenna tur chu a hlihsak a, Argentina-ah World Cup hi nghah a ni ta zawk a ni.

Chelsea rawlthar duhawm Cesare Casadei chu inelnaah hian best player atan thlan a ni a, Italy tan goal sarih leh assist vawi hnih a neih bawk avangin top scorer a ni bawk.