AS Roma-in Houssem Aouar an la lut

Ligue 1 club Lyon-a a contract hmang zo hlim Houssem Aouar chuan free transfer-in AS Roma a zawm a, Jose Mourinho-a team tan hian kum nga chhung khel turin contract a ziak a ni.

Kum 24 mi Aouar chuan, "Team lian tak, player ṭha tak tak nei a, fans duhawm tak tak neitu team an ni a, Roma zawm hi ka tan chuan thutlukna dik a ni. Giallorossi (Roma sawina) player ka ni ta a, ka theihna zawng zawng hlan turin ka inpeih a ni," a ti.

Lyon aṭanga inzir chhuak Aouar hian French club lo hi club dang tan a la khel ngai lo a, season sarih chhunga match 233 khelhsakin, goal 41 a khung a, assist vawi 36 a nei bawk.

France tan vawi khat a inlan hnuah Aouar hian March 2023 khan international-a a team hi thlakin, a nu leh pate ram Algeria tana inkhelh a thlang a, Algeria tan hian a la inlan rih lo thung.

Lyon hi 2019-20 season-ah khan Champions League semifinal khelhpuiin, Champions League squad of the season-ah a tel phak hial - Mourinho-a'n a chhawr dan tur hi hmuh a châkawm ta hle.

Roma general manager Tiago Pinto chuan, "Aouar hi player naupang tak, professional match 250 (reserve team tana a khelhte nen) chuang khel tawh a ni. Theihna sang tak nei, hmasawn zel tura beiseina sang tak kan neih a ni.

"Club dang ṭha tak tak aṭangin amah duhtu tam tak awm mah se, Roma tana khelh a duhnate hi kan tan chuan a lawmawm hle a ni," a ti a, Aouar an lalut chu an tihfuh a rin thu a sawi.