A vawi khat nan Denver Nuggets an champion ta; Nikola Jokic hoin NBA nomawi an hlawh chhuak

Basketball inelna lian NBA-ah season 47 zet an khel tawh a, hun rei tak chhung an nghah hnuah an duh ber chu an hlawh chhuak ve ta. Denver Nuggets chuan Miami Heat hnehin a vawi khat nan NBA champion an ni ta.

Nimin zing NBA Finals game 5 inkhelah Nuggets hian an mikhual Heat chu 94-89 in an hneh a, best of seven series khelh tur chu 4-1 in an la. Game hnuhnung pahnih khelh hah ngai loin an dinhmun an tichiang thei a ni.

Nuggets tan hlimna leh lawmna vawrtawp a nih laiin, chak lo Miami Heat erawh NBA Finals an khelh hnuhnung pathumah a chak lo zawkah an ṭang vek. Kum 2006, 2012 leh 2013 te erawh kha chuan an lo champion tawh thung.

A hmawr bawkna

Hnehna an chan chuan an champion thei dawn tih an hria a, anmahni khelmual a nih dawn bawk avangin Denver Nuggets an phur takzet. Ball Arena-ah a vannei zual mi 21,000 an lut thei a, stadium chhehvelah mi tam tak an pungkhawm bawk.

Quarter hmasa berah chuan point hnihin an hniam zawk hmasa phawt. Team pahnih an inkhel tawk a, chungnung zawk an awm hleithei lo. Quarter hnuhnung ber bul an ṭan dawnah pawh Heat lamin 70-71 in hma an la hruai.

Hun tawp nana minute hnih chauh a awm tawhah pawh Denver hi 89-88 in an la hniam, mahse Bruce Brown chuan lay-up mawi tak hmangin basket a nei a, a hnu lamah chuan hnunglam an hawi tawh lo - anmahni ṭantute hmaah hnehna hlado an chham.

Hnehna an chan theih nan hian Nikola Jokic chuan point 28 a nei a, ani bakah hian Michael Porter Jr (16 points), Jamal Murray (14), Kentavious Caldwell-Pope (11) leh Bruce Brown Jr (10) te an langsar bawk.

A bul ṭanna

Chenna ngai loh ramah an cheng a, an duhthusam leh suangtuahna chu a takin a chang. Nuggets coach Michael Malone chuan, "Keini leh mi zawng zawng tan chanchinthar duhawm bik a nih ngei ka beisei.

"NBA nomawi pakhat maiah hian kan lungawi dawn lo, a dangin a la rawn zui zel ka beisei," tiin a sawi a, tuna an hlawhtlinna chu a tawpna ni loin a bul an ṭanna chauh a nih thu a sawi chhuak.

Team enkawl hna a thawh ṭan dawn khan NBA coach hlui leh a pa ni bawk Brendan chuan a fapa hi a sulhnu zui lo turin a chah, mahse coaching hna chu a luhchilh ta tho a, kum 2018 khan a pa hnung a zui lui chu pawi a tih thu a lo sawi tawh.

Malone chuan, "Ka pa thu kha zawm tur ka ni, a chhan chu hna harsa leh hautak tak a ni. Basketball hi ka ṭhanlenpui a nih avangin ka thisenah a bet tlat a, a tir lamah hun harsa tawng ve mah ila tunah chuan hmabak ka hlen ta," a ti.