Intercontinental Cup final khel tur India

Hero Intercontinental Cup khelh mekah India chuan match khat khelh tur hmabak la nei chungin final an lut fel der a, Thawhṭanni zan khan Vanuatu chu 1-0 in an hneh - Sunil Chhetri chuan inkhela goal awmchhun hi a khung.

Blue Tigers hian Ningani zan dar 7:30-ah group stage-a an match tawp ber chu Lebanon nen an khel dawn a, tlawm pawh ni se pahnihna aia hniama an tlak theih tawh loh avangin final an khel dawn chiang a ni.

Lebanon hian Thawhṭanni zana Blue Tigers inlan hmain Mongolia chu 0-0 in an inhnehtawkpui a, India lakah point khat an hlawhchhuak a nih chuan anni pawh final khel turin an tling ang.

India fixtures a tawt deuh avangin coach Igor Stimac-a'n squad a siksawi a, Mizo forward Lallianzuala Chhangte pawh inkhel bul ṭantir a ni lo. Mahse, India-in goal an khung loh reng avangin Lunglei tlangval hi minute 66-naah Nandhakumar Sekar thlakin luhtir a ni tho.

ISL hero of the league ni lai Lianzuala chuan, "Goal khat aia tam khung thei kan ni a, chance pawh kan siam nasa. Kan match khelh leh turah chuan kan chance neihte goal-a chantir ngei a ṭul tawh ang," tiin Vanglaini a hrilh.

Blue Tigers squad-a Mizo awm ve dang Lalengmawia Ralte (Apuia) pawh Vanuatu lakah hian a inlan lo a, coach Stimac-a'n player inlan tam lote tan chance a siamsak.

Apuia chuan, "Kan khingpui turte ka en khan, final luh hi chu ka inbeisei sa hrim hrim," tiin Vanglaini a hrilh a, final luh tuma inelna a hmachhawn thu a sawi.

India hian goal khung loin hun an hmang ral mai dawn niin a lang hman a, mahse, minute 80-naah Chhetri inlarin, 'Captain Fantastic' hming lem an pek hian inkhela goal awmchhun a khung - a goal khung hi a nupui rai mek tan a hlan.

Bengaluru FC striker hian ram tan match 135 a khelh aṭangin goal 86 a khung tling ta der a, international football-a goal khung hnem palina ni turin goal thum khung a la mamawh.

International football-a goal khung hnem ber Cristiano Ronaldo chuan ram tan match 198-ah goal 122 a khung a, Iran tana match 148-a goal 109 khungtu Ali Daei chuan dawtin, Argentina legend Lionel Messi chuan match 174-a goal 102 khungin pathumna a ni.

Malaysia legend Mokhtar Dahari chuan match 142-ah goal 89 khungin palina a ni a, ani tluk tur hian Chhetri hian goal thum chiah a mamawh tawh.