North East aiawh tur Joseph Thankhuma

India rama cricket thuneitu sang Board of Control for Cricket in India (BCCI) hnuaia inelna khel turin Joseph Lalthankhuma chu thlan zingah a tel a, Mizo tlangval hi North East aiawhin a inlan dawn a ni.

June 28 aṭanga July 28 chhung khelh tur Duleep Trophy hi BCCI hnuaia inelna pawimawh niin, kum 1961-62 season aṭanga khelh tawh kha a ni a, tun hma chuan India ram hi hlawm hrang (zone) pangaah ṭhen hran ṭhin niin, 2019-20 aṭang khan NE Zone an siam belh.

Tun thlatir khan NE Zone tana Zonal Convener Naba Bhattacharjee kaihhruainain Guwahati-ah player thlangtute an ṭhukhawm a, he hunah hian NE aiawh tur player 15 bakah coaching staff pali an ruat fel a ni.

Inelna hmachawn turte hian a huhoin ni 12 chhung vel inbuatsaihna hun an nei dawn a, nimin khan Thankhuma pawh training nei tur hian Dimapur a thleng thla tawh a, inbuatsaihna a nei chhunzawm ve nghal ang.

Joseph Thankhuma chuan, "Midang aiin ni khatin training ka zawm tlai hret a, mahse theihtawp ka chhuah dawn. North East team ni mah ila Mizoram hming a nihna chen a awm a, inkhel bul ṭantu zinga tel ngei tumin theihtawp ka chhuah dawn," tiin Vanglaini a hrilh.