Player hlu ber Nikola Jokic

Denver Nuggets thiampuia Nikola Jokic chu 'Bill Russell NBA Finals MVP Award' hlan a ni. Regular season bikah chuan Most Valuable Player atan 2021 leh 2022 khan thlan a lo ni tawh bawk a, a tan chuan Finals MVP hi a hlu danglam ngei ang.

NBA Finals an khelh hoah hian, chawlhrualin match khatah point 30.2 zel a nei tling a, hei bakah hian rebound vawi 14 lain assist vawi sarih nei zel anga chawhrual theih a ni bawk, team tan a thawhhlawk hle.

Kum 28 mi Nikola Jokic chuan, "Player zawng zawng kan inringtawk êm êm a, kan ṭhiante kan rin ngam bawk avangin hetiang dinhmun hi kan thleng. Tunah chuan kan hna kan hlen chhuak a, a lawmna hun kan hmang zui ang.

"Basketball hi infiamna nuam leh hlimawm a nihzia pawh a takin kan hre thar leh bawk, mi tam tak rinkai ni phak lo khan ropuina kan chang thei, team hna thawhrah liau liau a ni," tiin a ṭhiante vanga MVP ni thei a ni tih a sawi.

French Open khelh zawh takah Novak Djokovic a champion a, tennis inelna lian Grand Slam bikah champion hnem ber (23 titles) a ni. Djokovic ang bawka Serbian infiammi Jokic chu basketball lamah a ropui leh ta, an ram tan hun lawmawm bik a ni ngei ang.

Jokic chuan, "Tennis player ṭha bera chhal ngam Novak Djokovic kan nei a, tunah NBA champion kan awm ve leh ta. Serbia ram tan chuan hun lawmawm a ni," tiin a sawi a, tennis legend Djokovic ang bawka ram leh hnam veitu a nihna a tilang a ni.

Serbian star hian theihna a nei sang a, kum 2015 aṭang khan Denver Nuggets tan hian a la khel ngar ngar. Champion tur chuan mimala ṭhat ringawt a tawk si lo, amah duhsaktu ten champion theihna team zawm ve mai tur pawhin thurawn an pe fo.

Mahse, Denver Nuggets chhuahsan duh loin chona a hmachhawn zel a, tunah chuan club legend tia hriatreng a hlawh tawh ang. NBA All-Star zinga vawi nga tel tawh Jokic chuan, "Kan thil tum hlen chhuak tur hian pumpelh kawng hnai zawk a awm lo tih hriat a ngai," a ti.

Kum 2014 NBA draft-ah khan Jokic hi pick 41-na a ni a, thlan hmasak zingah a tel lo chiang hle. Mahse, tunah zet chuan player an draft zinga a hniam ber ni chunga NBA Finals MVP ni thei hmasa ber a ni ta hial, a thlen chin hi a sang hle.