Paris St-Germain-in Kylian Mbappe hralh an duh

Nipui transfer boruak a inhawng a, rin loh tak tak transfer boruak hriat tur a awm leh ta - Paris St-Germain chuan an thiampuipa Kylian Mbappe hralh an tum a, Real Madrid hming lam rik nghal a ni.

Kum 24 mi forward hi kum 2024 nipuiah a contract a hmang zo tawh dawn a,a ṭul dan a zira kum khat dang la pawhsei leh theih a ni. Mahse, Mbappe hian PSG hnenah contract pawhsei a tum loh thu a hrilh.

French club hian season khat dang an kawl a nih chuan season tawpah a thlawn thei dawn tih an hre ve reng a, French striker hi kum khat hnu lawka a thlawna chhuahtir ai chuan tuna chhuahtir an duh.

Mbappe pawh hian chhuah hi a pawi ti loin a rinawm a, French striker hma hun zel tur hi hriat a châkawm hle - PSG hian an hralh dawn a nih ngat chuan pound maktaduai 172 aia tlawma hralh an tum lo nia sawi a awm bawk.

Buaina inṭanna

Season hman zawh tak ṭan hma khan Real Madrid chuan Mbappe hi lakluh ngei tumin PSG an dawr a, mahse, French club hian an player chhuanvawr hi chhuahtir an phal lo - France president Emmanuel Macron hial a inrawlh!

Macron hian kum 2024-a Olympic an thlen tur chu chhuanlama hmangin Mbappe chu an ram club-a cham turin a thlem a, kum 2007-2012 inkara France president Nicolas Sarkozy chuan Mbappe hi cham turin a thlem ve bawk.

Hetihlai hian PSG neitupa Nasser Al-Khelaifi pawhin Mbappe a bia a, kum naupang tak a la nih avangin a beisei em em Champions League nomawi chawi turin PSG-ah hun ṭha a neih thu a hrilh a, French club-ah hian a tithei ta lo a nih pawhin club dang panna khua a tlai loh thu a hrilh.

PSG-in a tawpah Mbappe an hmin a, sum tam tak an pe bawk - thla khatah pound maktaduai li a hlawh nia sawi a ni a, contract thar a ziah avang hian pound maktaduai 100 an pe niin an sawi bawk.

Contract chu

Mbappe hian PSG-ah hian kum hnih cham turin contract thar a ziak a, a ṭul dan a zira kum khat dang pawhsei theih tura tih a ni - French forward hian 2024 nipui thleng contract a nei a, 2025 thleng a pawtsei thei tihna a ni.

Mahse, an inremnaah hian inziak tel pakhat a awm - Mbappe hian contract thar hi a ziak dawn a nih chuan July 31, 2023 ral hmain PSG thuneitute a hrilh tur a ni, tih a ni a, contract-in a phut angin a hrilh ta ngei a, a thu hrilh erawh contract thar a ziah loh tur thu a ni thung.

PSG hian lungawi lohna langsar tak pakhat an nei - Mbappe thutlukna hi French chanchinbu lar L’Equipe journalist kaltlangin an hre hmasa a, a hnuah Mbappe thutlukna hi lehkhain an dawng ve chauh!

Hetiang boruak kara thawhho reng hi PSG chuan a theih lohah an ngai a, Mbappe hi chhuahtir mai an duh - star langsar tam tak lei a, team ropui tak din tumin PSG hian hma la ṭhin mah se an hlawhtling hleithei lo a, tun season-ah indinthar an tum nia sawi a ni.

Engtin zel?

PSG hian Lionel Messi leh Sergio Ramos pawh an lo chhuahtir tawh a, Neymar pawh chhuahtir an tum nia sawi a ni. Tunah Mbappe hming a ri leh ta a, French forward erawh kum 24 mi chauh a la nih avangin tlawm taka chhuahtir an tum lo.

Chutihrual chuan Mbappe hian a hlawh tam tak leh man tam tak avangin European club zingah duhtu a nei ang em, tih chu zawhna a awm. Real hian Karim Benzema an chân avangin Mbappe hi lakluh an duh ngeiin a rinawm a, pawisa an nei ang em, tih erawh zawhna a awm.

Real hian Borussia Dortmund aṭangin Jude Bellingham lak an remti tawh nia sawi a ni a, mahse, £88mtd tal sen a ngaih dawn bakah a hlawh hnem dawn a, Mbappe lakluh nan uchuak taka sum sen an harsat mai thei.

Hei chauh a ni lo - Real hian Tottenham Hotspur striker Harry Kane an duh nia sawi a awm a, English striker lam an hawi a nih chuan Mbappe hi an tan lakluh tel a harsa bawk ang.

Club dang hi

France tan match 68-a goal 38 khung thei Mbappe hian 2017 khan PSG hi a zawm a, tun hnai season nga chhung Ligue 1-ah top scorer niin, PSG-a season ruk hun a hman chhungin league nomawi panga a chawi bawk.

PSG tan hian match 260-ah goal 212 khungin, assist vawi 98 a nei a, season hman zawh takah khan match 43 aṭanga goal 41 khungin assist vawi 10 a nei bawk - a record thlir chuan club tam tak chil tiputtu tur a ni.

Mahse, Mbappe hi a man a tam bakah a hlawh a tam miau a, club zawng zawng tan a harsa. Mbappe nu, a fapa transfer chungchang buaipuitu ber Fayza Lamari hi Liverpool fan a ni a, Reds nen sawizawm ni mah se Mbappe lakluhna tur sum an neih a rinawm lo.

Chelsea hian sum ren lo viau mah se Champions League an khelh dawn loh avangin Mbappe hian a pan hrehin a rinawm a, hming lam rik zingah Manchester United an tel bawk - mahse, Cristiano Ronaldo enkawl thei lo Erik ten Hag hian a enkawl thei ang em, tih chu zawhna a ni.