Pro Volleyball Tuichang lakah TNT an chungnung

Thutak Nunpuitu Team (TNT) chuan Tata SK 712 Pro Volleyball League-ah bul an ṭan fuh an chhawmnung zel. TNT hian Thawhṭan zan inkhel hmuhnawm takah Tuichangral chu 3-1 (28-30, 25-15, 25-18, 29-27) in an hneh.

Muanna venga inbengbel TNT hian an match hmasa zawkah Durtlang North an hneh tawh bawk, champion lai an hneh hnua Tuichangral an hneh zui leh avangin an lakah beiseina a sang zui dawn. June 16, Zirtawpni zan hian Chhinga Veng Spikers nen an inkhel leh ang.

R. Dengṭhuama Indoor Stadium, Mualpuia inkhelah TNT hi a chefuh zawk an ni nghal mai bik lo, set hmasa ber an hloh. Mahse, zawimuangin an insiamṭha zel a, hun pawimawhah Vanlalṭanchhana (Valbuanga) inlarin a team a chak pui.

Kawnpui tlangval hian point 31 zet a hlawhchhuak a, vawi nga chauh tihsual a nei bawk. Durtlang North an hneh ṭum ang bawkin D-3 Business Player of the Match atan thlan a ni, innghana tlak a nihzia a takin a lang.

Set khatna inchuhin vawi nga ngawt an deuce hnuah TNT hi 29-28-in an hniam, an thiampuipa Valbuanga'n vaw sualin 2018-a finalist Tuichangral an tlang. Vinod Khatkar neitu Tuichang ṭantute thawm a ring hle.

TNT an insiamṭha nghal - Valbuanga bakah net bula an khingpui ball hlap dangtu ber Zosangzuala'n a thawhhlawk takzet, inkhel chhungin point khat chiah hlohin point 13 a thawk chhuak thung.

Dinchhunga, Sadraka Fanai leh Vanlalchhantluanga Sailo te awmna team TNT hian inrintawkna an nei sang tawh a, tihsual an nei tlem ṭhin hi team dang nena an danglamna a ni, inbuatsiahna an neih ṭhat an chhawr hle.

TNT hian volleyball an ngaina a, an nunphunga bet ve pakhat a ni. Tualchhung inelna hrang hrangah an champion hnem tawh a, mahse Pro Volleyball League-ah erawh an la hlawhtling lo - kuminah Mizo hlanga hlawhtlin an tum.

Thawhṭanni tlai khan hmeichhe inelna neih niin, a zawna an chakna ni turin Bungkawn chuan Power Department Sporting Club chu 3-2 (25-10, 21-25, 25-17, 25-27, 15-9) in an hneh a, point 45 tehmeuh neitu Lalparmawii chu D-3 Business Player of the Match atan thlan a ni.

Bungkawn hian match thum an khelh tawhah vawi hnih hnehna an chang a, point nga hmuin team paruk inel zinga pathumna an ni mek. An inkhelh kual vek hnuah a sang zual pali ten semifinal an khel ang.