Everton director pathum an chhuak

Premier League club talbuai Everton chuan an club director pathum an ban thu an puang a, club director bangte hi chief executive Denise Barrett-Baxendale, chief finance & strategy officer Grant Ingles leh non-executive director Graeme Sharp te an ni.

Everton chuan thuchhuah siamin, director chhuak tate hmun ruak luah lailawk tur leh club chairman Bill Kenwright te hma hun tur chu darkar 48 chhunga tihfel a nih tur thu an sawi.

Club director pathum chhuak chuan thuchhuah inṭawm siamin, "He hmuna hun kan hman chhung khan kan theihna zawng zawng kan hlan a, Everton chhuahsan tura thutlukna siam a ngai ta hi hrehawm kan ti hle a ni. Kan Chairman kaihhruainain hun harsaah pawh rim taka thawkin, Everton tana hmachhawp ropui tak takte kan chhawp chhuak a ni.

"Heng ruahmannate hian rei zawk atan Everton hma hun hi a veng thei dawn a ni. Board-a hun kan hman ve chhunga sum lama kan hmasawnnate kha kan chhuang êm êm a, club stadium thar sakna tura hma kan la theite kha kan lawm hle," an ti a, club tana an hnathawhte chu a nep loh thu an sawi - mahse, Everton thuneitute hi tun season an result avangin fans tam takin chhuak turin an duh a, vauna pawh an tawk nual a ni.

Everton hian mi 53,888 lenna tur stadium thar an buaipui mek a, mahse, a tira sum ruahman sa pound maktaduai 500 chu £760mtd tal sen a ngai dawn niin a lang a, club neitu Farhad Moshiri chuan Everton-a investment tiduh a zawng mek.

Merseyside club hi MSP Sports Capital nen an inrem hnai nia sawi a ni a, New York khawpuia hmunpui nei MSP hian Everton-ah share an nei thei dawn a nih chuan board-a ṭhut ve an duh a ni.

Hetihlai hian Real Madrid manager Carlo Ancelotti chuan a club hlui Everton hi London khawpuia High Court lamah a khing mek a, an buaina hi commercial contract chungchang a nih thu bak tarlan a ni lo. Kum 64 mi Ancelotti hian December 2019 - June 2021 inkar kha Everton hi a enkawl a ni.