AC Milan-in Berlusconi an thlah

Serie A club chuan an club neitu hlui, Thawhṭannia kum 86 mi nia thi ta Silvio Berlusconi chu an thlah a, Italy Prime Minister hlui chu an tan theihnghilh theih a nih loh thu an sawi.

AC Milan chuan, "Hrehawm kan ti takzet a, AC Milan chuan kan theihnghilh ngai loh Silvio Berlusconi thihna hi kan tuar hle a ni. A chhungkua, a thawhpui leh a ṭhianṭhate he hun harsaah hian kan hre reng a ni," an ti a, an club neitu hlui an thlah.

Berlusconi hian kum 1986 khan khatihlaia club talbuai tak AC Milan hi leiin, European football-a team hlawhtling ber pawlah a siam a, a hnuaiah Champions League nomawi panga an chawi bakah Serie A title vawi riat an chawi thei a ni.

Kum 2017 khan Berlusconi hian Milan hi euro maktaduai 740-in a hralh zui a, mahse, thla 18 hnu lawkah football lamah bawk kir lehin third division club Monza-ah 100% share chu a company Fininvest kaltlangin a lei.

Monza-ah hian Milan chief executive hlui Adriano Galliani nen thawk dun lehin, kum 110 chhunga a vawi khat nan Serie A an hruai kai leh a ni. Monza pawhin thuchhuah siamin, "Kan hnenah i awm reng ang. Adriano Galliani leh AC Monza mourn chuan Silvio Berlusconi thihna hi a tuar takzet.

"A hmun ruak hi engti kawng mahin hnawhkhah theih a ni dawn lo a, President, i chungah engkim avangin kan lawm e," an ti a, an club neitupa chu ui tak chungin an thlah.

Real Madrid manager Carlo Ancelotti pawhin a pu hlui thlahna thu sawiin, "Vawiina kan hun tawn hrehawm tak khan ani nena hun hlimawm tak kan lo tawn tawhte kha a thai bo thei lo ang. President mai ni lo, pa rorum, rinawm, fing, thawkrim em em hi footballer ka nihna angin ka nunah hmun pawimawh tak a chang a, a hnuah coach ka nihna angin - a chungah hian lawmthu sawi sen loh ka ba a ni. President ka lawm e," a ti.

Ancelotti hian kum 1988 khan AC Milan chu league nomawi chawipuiin, Berlusconi hnuaia Serie A nomawi an chawi hmasak ber a ni a, 2001-2009 inkar khan coach a nihna angin AC Milan hi a enkawl leh bawk.

Berlusconi hian Ancelotti hi a defensive tactic avangin a tirah sawisel deuh mah se, Champions League nomawi vawi hnih chawpuiin, Coppa Italia leh Serie A-ah a champion pui bawk a ni.

AC Milan hmelma Inter Milan pawhin Berlusconi thlahna thu chhuahin, "Theihnghilh tawh ngai loh tur sulhnu kan ram tan a hnutchhiah a, Inter leh a club Milan inkara inelna chuan Milan khawpui hi football khawvel hmaah a pho chhuak a ni," an ti.

FIFA president Gianni Infantino chuan, "Football khawvelah mi tam tak hmuh loh kha a lo hmu lawk ṭhin a, AC Milan chanchina an President hlawhtling ber a ni hial a ni. Tun hnaiah Monza neitu a nihna angin fans tam tak beiseina a tihlawhtling a, tupawhin beiseina kan nei thiang tih a pholang a ni.

"Chutiang ang tak chuan amah hi hriatreng ka duh a, football-a a sulhnu ang hian hriatreng ka duh - beiseina nei a, chu beiseina a tak rama chantir ṭhintu a nihna kha," a ti a, a thlah thiam hle.

Italy Prime Minister vawi thum ngawt ni thei Berlusconi hian chhiah chungchang, thamna, sum tihchingpen leh thil dang tam tak avangin thubuai a ngah ṭhin hle a, kum 20 vel chu court-ah vawi 2,500 vel a inlan hman ang hialin an sawi - mahse, football erawhin football tana a hnathawh ropui tak avangin a hre reng ang.