Newcastle-in Minteh an la lut

Champions League khel tur Newcastle United chuan Gambian winger Yankuba Minteh chu Danish club Odense aṭangin an lalut a, mahse, season lo awm tur hi Feyenoord lamah loan-in hun a hmang zui ang - a contract rei zawng tarlan a ni lo.

Minteh hian season hman zawh takah khan Danish Superliga match 17 khela goal li khungin, assist vawi ruk a nei a, a man hi pound maktaduai 5.8 vel niin khawthlang media-te chuan an tarlang.

Magpies sporting director Dan Ashworth chuan, "Yankuba-te ang theihna nei sang tak, Newcastle United-a kan lalut thei hi ka lawm hle. Denmark-a season tluan a khelh hmasak berah a ti ṭha hle a, hmabak êng tak a nei a ni," an ti.

Kum 18 mi Minteh hian Gambian club Steve Biko FC aṭanga a professional career ṭanin, nikum July khan Odense hi a zawm ve chauh a, ram tan vawi hnih inlan tawhin, friendly match-ah DR Congo leh Liberia a hmachhawn tawh.