Hey Jude! Real an inthuam ṭha ṭan; a bul ṭanna Bellingham

Spanish La Liga leh Champions League nomawi an humhim zawh loh hnuah Real Madrid-in inthuamṭhat hna an ṭan nghal a, nipui transfer bazar-a lawm avanga lam hmasa ber chu Real fan-te an ni - English midfielder Jude Bellingham an lakluh thu nimin khan an tichiang.

Real hian Borussia Dortmund player chhuanvawr lakluh nan hian pound maktaduai 88.5 an seng a, a khelh ṭhat dan a zirin a man hi pound maktaduai 115 thlenga sang chho thei tur a ni - Santiago Bernabeu-ah hian kum ruk cham turin contract a ziak.

Bellingham hi English player man to pahnihna a ni nghal a, a chungah hian Manchester City-in pound maktaduai 100-a an lei Jack Grealish a awm - mahse, a khelh ṭhat chhoh a, a man hi an pek belh a ṭul chuan English footballer man to ber a ni thei ang.

Birmingham City aṭanga professional career ṭantu Bellingham hi vawiin chawhnu hian Real Madrid player a nihna angin phochhuah a ni ang a, media a hmachhawn zui dawn bawk a ni.

Hey Jude!

Kum 19 mi lek ni chungin Bellingham hian England tan match 24 a khel der tawh a, hei hian player ṭha a nihzia a hrilhfiah - Birmingham aṭanga a professional career ṭanin, kum 2020 khan Dortmund a zawm.

German club-ah hian a theihna tak tak pholangin, season thum a khelhsak hman a, inelna hrang hrangah match 132 khelhsakin goal 24 a khung a, assist vawi 25 a nei bawk - season thum chhung hian season hnihah Bundesliga team of the season-ah a lang phak.

Season hman zawh takah khan inelna hrang hrangah match 42 khela goal 14 khungin, assist vawi sarih a nei a, Bundesliga tawp niah league nomawi chawi zo ta lo mah se Bundesliga player of the season atan erawh thlan a ni ta tho a ni.

Dortmund-ah hian captain armband-te pawh hren tir niin, kum 19 mi midfielder hi Dortmund chanchina captain dinhmun luah thei naupang ber a ni hial - a kum la nau deuh mah se hruaitu ṭha ni tura theihna nei a ni.

Duhthlanna

Manchester City leh Liverpool pawhin Bellingham hi lakluh an duh a, rei tak chu an hel - Liverpool bik erawh April khan an inhnukdawk a, English midfielder hi Dortmund-in man tlawm taka kaltir an tum loh avangin a leina tur pawisa an neih loh thu an sawi.

Reds manager Jurgen Klopp chuan, "Naupangin Krismas-a Ferrari car an ngen ang chauh kan ni dawn asin," a ti a, an tan Jude beisei tlat chu thil theih loh a nih thu a sawi.

Bellingham hian kum 17 a nih laiin Dortmund hi pound maktaduai 25-in a zawm a, football chanchina kum 17 mi man to ber a ni hial - Birmingham chuan season khat chiah professional anga an tana a khel chungin a jersey number 22 chu an dah ṭha.

Championship club hi an chet dan avangin tam tak chuan an sel a, kum 17 mi chungchanga che 'over' hretah an ngai. Mahse, season thum a liam leh meuh chuan khawvela player langsar pawl a ni phak a, Birmingham an nuih tawh lo.

Duhtak Jude

Dortmund chuan an player hlui Jude hi thlahin, "Jude, i hma hun atan Dortmund ami zawng zawngte hian duhsakna kan hlan che. Kan hun hman ho, minute tin avang khan i chungah lawmthu kan sawi e," an ti.

Jude pawhin a club hlui hi thlahin, "BVB ami zawng zawngte chungah kum thum hun kan hman ho avang khan lawmthu ka sawi. Kan hun tawn ho, a lian a tê pawh ni se, khang zawng zawnga he club jersey ka ha thei hi ka inchhuang hle.

"Ka hma hun thlir reng chungin, he hun thleng tura ka zinkawngte kha ka theihnghilh lo ang. Borusse ka ni reng tawh dawn a, in hmalam hun atan duhsakna ka hlan a che u - Heja BVB!" tiin German club a thlah.

Dortmund chief executive Hans-Joachim Watzke chuan, "Borussia Dortmund tan kum thum ngawt a theihna zawng zawng a hlan avangin Jude chungah lawmthu kan sawi a, hun hlimawm tak kan hmang ho a ni. Real Madrid pawh langtlang taka kan indawr tawnna avangin lawmthu kan hrilh e," tiin a sawi.