Nations League Semifinal; Zanin 12:15-ah Spain Vs Italy

Nations League semifinal hnuhnung zawk chu zanin dar 12:15 hian Europe football ram lian pahnih Spain leh Italy ten De Grolsch Veste, Enschede-ah an khel dawn.

La Roja hi inelna hnuhnung berah khan pahnihna an ni a, semifinal-a an hneh chu tun ṭuma an hmachhawn tur Azzurri tho hi an ni.

Beisei pha lo

Roberto Mancini hnuaiah Italy an indinthar a, kum 2021 khan Euro 2020-ah an champion hial. Mahse, European champion Azzurri hi FIFA World Cup hnuhnung berah khan an tling zo lo.

Euro 2024 khel tur zawnnaah pawh Italy hian match hmasa berah Euro hnuhnung ber final-a an hneh England chu an mual Stadio Diego Armando Maradona, Naples-ah 2-1 in an hneh lo.

Spain hian Luis Enrique hnuaiah Euro 2020-ah semifinal hial an thleng pha a, penalty shootout-ah zanina an hmachawn tur Italy lakah an vanduai. La Roja hi an khelh ṭhat em avangin World Cup-ah pawh che ṭha tur beisei an ni a, rin ang ngawtin thil a thleng lo.

Enrique kaihhruai Spain hian Qatar-a neih World Cup-ah Germany hnehin bul ṭan mah se group stage pawh an paltlang ṭawk. Second round-ah Morocco an hneh lo zui a, coach Enrique pawhin Spain enkawl hna a chawlhsan.

Ram lian nge nge

Spain leh Italy hian tun hnaiah beisei pha lo mah se football-a sulhnu nei ṭha ram an nih avangin an inkhel hi en a châkawm bik a, chu mai a ni lo - team pahnih hian player ṭha an kawl ve ve.

Italy-in Euro 2020 semifinal-ah an hneh a, Spain-in Nations League 2021 semifinal-ah an hneh thung. Hei hian an intluktawkzia a pholang a, zaninah pawh chak tur zawk hriatthiam a har hle.

Azzurri hian PSG keeper Gianluigi Donnarumma an nei a, UCL final-a Inter Milan tlarhnung pathum Francesco Acerbi, Alessandro Bastoni leh Federico Dimarco te an awm a; Napoli right back Giovanni Di Lorenzo a awm bawk. Defence laiah hian hming langsar zawk Leonardo Bonucci pawh an la nei a, anni aia ṭha an awm a nih pawhin an tam bik lo ang.

Midfield-ah pawh Nicolo Barella, Jorginho leh Marco Verratti te an awm a, tlarhmaah Federico Chiesa, Mateo Retegui leh Lorenzo Pellegrini te an nei. Giacomo Raspadori leh Ciro Immobile ten bul an ṭan zawk thei bawk. Kum 24 mi Retegui hi Argentine club Tigre-a khel daih ni mah se Italy tan match hnihah goal hnih a khung tawh a, en bik a sual lo ang.

Spain-in coach thar Luis de la Fuente hnuaiah Norway 3-0 a hnehin bul ṭan mah se Scotland lakah 2-0 in an tlawm. La Roja coach thar Fuente hian Enrique ngaihdan ṭawmpui zuiin David de Gea a ko tel lo a, Chelsea keeper Kepa Arrizabalaga chu bul ṭan thei dinhunah a ding.

Chutihrualin squad-ah Real Madrid player pali Nacho, Dani Carvajal, Marco Asensio leh Fran García te a telh. Midfielder ṭha mi Sergio Busquets chawlh tawh mah se UCL best player Rodri a awm. Spain hian mimala hming langsar tak an kawl lo a, tlarhamah Álvaro Morata, Dani Olmo leh Asensio te chungah rinna an nghah a ṭul ang.