Kan chak ngei ngei a ngai - Lianzuala

India chuan zanin dar 7:30 hian Hero Intercontinental Cup-a an group stage match hnuhnung ber chu Lebanon nen an khel dawn a, Blue Tigers hian final lut chiang tawh mah se zaninah hnehna chan ngei ngei an mamawh - zanin inkhel hi World Cup qualifier-a an hma hun hril theitu tur a ni tlat.

India hi FIFA ranking-ah 101-na an ni mek a, tun hnai an result avangin top 100-ah an awm dawn - an hmabak match hnih la awmah an chak chuan an ranking hian hma a sawn lehzual dawn a, chumiin a ken tel chu World Cup qualifier-a hmun pawimawh a ni.

Blue Tigers hian FIFA ranking-ah top 100 chhung an luah ngheh theih chuan World Cup qualifier draw neih a nih hunah pot 2-ah an awm dawn - pot 2-a an awm chuan draw neih hunah, team nem zawk nen group khata awmna chance a sang tihna a ni.

World Cup 2026 hi Canada, Mexico leh United States ten an inthlen ṭawm dawn a, team 32 inel ṭhin chu team 48-ah tihpun a ni dawn a, Asia khawmualpui pawhin 8+1⁄3 hmun an nei tawh dawn - pariat hi direct-in an tling ang a, inter-confederation playoff hmangin pakhat tan chance a awm leh dawn bawk.

ISL hero of the league Lianzuala chuan, "Team kan hmachhawn tawhte ai chuan an ṭha zawk dawn a, mahse, kan game hmachhawn dan ṭhin pangngaiin kan hmachhawn ang. Chak ngei tuma kan theihna zawng zawng kan pek chuan kan hneh theih ngei ka ring," tiin Vanglaini a hrilh.

Lianzuala chuan, "Final lut tawh mah ila, inthlahdah theih a ni lo, inelna boruak a sang," a ti a, Lebanon pawhin hnehna chan ngei tuma an hmachhawn tur thu a sawi.

Mizo forward Lianzuala hian inkhel bul a ṭan tura ngaih a ni a, ani bakah hian Mumbai City tana a khelhpui Lalengmawia Ralte (Apuia) chu squad-ah hian a awm bawk.

Lebanon hian age level-a USA tana inlan, senior team-a Lebanon tana khel, forward Soony Saad leh UAE Pro League thlenga hming lo chher tawh Hassan Maatouk an nei a, anni pahnih hi India tan ven uluk an ṭul ang.