Reliance Youngchamps; Naupang League - Inter Dist C'ship an nei mek

AIFF leh MFA te hriatpui naupang football zirna Reliance Foundation Young Champs chu kalpui zel a ni a, Thawhlehni aṭang khan RG Stadium, Mualpuiah Naupang League Inter District Championship neih ṭan niin June 17, Inrinni hian zawh tum a ni.

Reliance Foundation Young Champs hi nikum November thla aṭang khan kalpui ṭan a ni a, age category pali Under 7, U9, U11 leh U13-ah ṭhen a ni. Aizawl bik hi RG Stadium-ah kalpui a ni a, district dang pathum Champhai, Kolasib leh Lungleiah kalpui a ni bawk.

Aizawl bikah hian team 12 an awm a, team tin hian age category pali U7, U9, U11 leh U13 an nei vek a, naupang 600 chuang zet an awm.

League match hi Inrinni leh school chawlh remchangah an nei ṭhin a, under 11 leh under 13-a team tin hian match 30 chuang an khel tawh. Kar khatah coaching vawi thum vel neih ṭhin a ni bawk.

Inter Dist C'ship-ah hian district tina U11 leh U13 champion bakah team danga player ṭha thlan khawm (Best of the Rest) ten an khel. Tun ṭum inelnaa che ṭha player 40 thlanchhuahten Mumbai-ah football tour an nei ang.

Reliance - MFA project-a head coach K. Lalrindika chuan, "Mizo naupang zingah talent nei ṭha tak tak ka hmu a, a lawmawm ka ti. Tuna naupangte hi nakina Mizoram la tihming ṭhatu tur an ni a, naupan lai aṭanga an zir ṭan chuan an len hunah pawh an thiam bik ngei ang. Reliance hmalakna hi a ṭha êm êm a, Mizoram pawh kan kalpui reng theih nan Mizo mipuite pawhin kan hlut thiam a ṭul hle," tiin Vanglaini a hrilh.