Chhuah duh lo Mbappe an hralh châk!

Season ṭan dawn khan Kylian Mbappe-a'n Paris St-Germain chhuahsana Real Madrid zawm a duh a, mahse, PSG hian sum tam taka nena thlem lungawiin, Paris khawpuiah a cham.

Nipui transfer a inhawn leh meuh chuan thawnthu a danglam ta - PSG-in Mbappe hralh an duh a, French forward hian Paris khawpuiah season khat dang la cham a duh thung!

PSG hian Mbappe hi chhuahtir an duh ngawr ngawr erawh a ni hran lo. Mahse, kum 2025 thlenga a contract pawtsei tura an beisei chu Mbappe hian a pawtsei duh lo a, June 2024 thleng contract a neih chu hman zawh a tum.

French champion hian a duh ang anga Mbappe tal vel an rem ti lo thung a, nakkuma man nei loa an forward hi chhuahtir ai chuan man a neih theih laia hralh an duh - an ṭan hmun sawh sawn an tum lo.

Buaina inṭanna

Mbappe-a'n nikuma contract thar a ziah khan, season hnih atan a ziak a, kum khat dang pawhsei theih a ni. Mahse, Mbappe hian contract thar a ziah dawn leh dawn loh chu July 31, 2023 ral hmain PSG thuneitute a hrilh tur a ni, tih a inziak tel.

French forward hian PSG hi contract thar a ziah loh tur thu lehkhain a hrilh a, mahse, PSG hian Mbappe thutlukna hi French chanchinbu lar L’Equipe journalist kaltlangin an hre hmasa niin an sawi a, an lungawi lo.

Hei vang hian Mbappe hi chhuak turin an duh a, man a neih theih laia hralh an duh. Mahse, Mbappe chuan PSG lungawi lohna hi chhangin, July 15, 2022 khan contract thar a ziah loh tur thu hi Paris club hi a hrilh tawh niin a sawi.

Mbappe chuan, "Lehkha kan pek hi chu a hmaa kan lo sawi lawk tawh tihchianna chauh a ni," a ti a, Mbappe team lam chuan, "Nikuma a contract a pawhsei loh tur thu a sawi aṭang khan contract chungchang hi, tun hnaia lehkha kan pek hma kha chuan sawi a la ni leh lo," an ti ve bawk.

Ka cham dawn

Mbappe aiawhten contract pawhsei chungchang engmah sawi a nih loh thu an sawi a, Mbappe pawhin PSG-ah a hlim thu leh a cham tur thu a sawi - nipuiah Real Madrid zawm duh anga an sawi pawh French forward hian, "Dawt" tiin a chhang a ni.

Kum 24 mi forward chuan, "Season tharah PSG tan ka la khel dawn tih hi ka lo sawi daih tawh a, he hmunah hian ka hlim êm êm a ni," a ti a, "PSG chhuahsan ka dil lo a, Real Madrid zawm ka dil lo bawk. Club hnenah hian June 2025 thleng cham tura contract ka pawhsei loh tur thu zawng ka hrilh," a ti.

Mbappe team lam chuan, "Vantlang hriata season thara PSG player a la nih zel tur thu sawitu Kylian hian nipuia chhuah a dil lo a, chutihrual chuan a contract pawhsei a tum loh thu pawh club thuneitute a hrilh tawh," an ti bawk.

PSG-in hralh an duh laiin Mbappe-a'n a cham tur thu a sawi a, French forward hian season khat hnua free agent nih a, mahni duh lam club pan a châk niin a lang. Mahse, PSG tan euro maktaduai 180 zet senga an lakluh a thlawna chhuahtir hi a uiawm dawn. Kum 2017-a PSG zawmtu Mbappe hian Paris club tan match 260-ah goal 212 khungin, assist vawi 98 a nei a, season hman zawh takah khan match 43 aṭanga goal 41 khungin assist vawi 10 a nei bawk - a man hi a tlawm thiang lo!

A chhuak dawn?

Mbappe-a'n cham a tum thu sawi mah se contract thar ziah a tum miau loh avangin PSG hian an ṭan hmun tihdanglam an tum lo nia sawi a ni a, chuti a nih chuan Mbappe tan pawh cham luih a châkawm lo ang - zawhna chu khawi club nge a zawm ang, tih hi a ni.

Real Madrid hi hming ri ring ber an ni lo thei lo. Season hmasa khan Mbappe hi pound maktaduai 127-a lakluh an rem ti thlap tawh a, a hlawh atan season khatah £34mtd pek an inhuam bawk. Mahse, Mbappe hi PSG-ah a cham a, heti chung hian Real tana khelh chu a duhthusam a la nih reng thu a sawi tho.

Real hi striker chhuanvawr Karim Benzema chuan Saudi Arabia lam a pansan tawh a, hei vang hian number 9 player an mamawh hrim hrim - Tottenham Hotspur striker Harry Kane nen sawi zawm an ni a, kum 29 mi ni tawh Kane pawh hi sum tam tak senga lakluh a ngaih dawn tho avangin kum naupang zawk Mbappe lam an hawi mai ang em, tih chu zawhna langsar a ni.

Chutihrual chuan Carlo Ancelotti team hian £88.5mtd-in English midfielder Jude Bellingham an lalut tawh a, England tana khel dun sa player pahnih rem hi an thutlukna a ni thei ve bawk.

Hello England!

Kum 24 mi lek ni chunga ram tana match 68-a goal 38 khung thei a ni a, Mbappe hi a nep lo - Premier League club zingah pawh duhtu an awm nual a, hming langsar tak pakhat chu Manchester United an ni.

United boss Erik Ten Hag hian Kane a duh nia sawi a ni a, English striker hma hun hian Mbappe dinhmun hi a khawih tel pha viau tihna a ni - United hi Sheikh Jassim bin Hamad Al Thani leh Sir Jim Ratcliffe ten lei an tum mek ve ve a, media ṭhenkhat chuan Sheikh Jassim hian a chang dawn niin an sawi tawh.

Tu pawh lo ni ta se, United lei hlima fans rilru hneh nan player hraw tak lakluh an duh ang tih a chiang a, hei vang hian Red Devils hian Kane emaw Mbappe emaw chu an rim ngei ngei a rinawm.

Hetihlai hian tun hnai season nga chhunga Ligue 1 top scorer ni thei Mbappe hi sum tamna Saudi Arabia nen pawh sawi zawm a ni a, mahse, French forward hi Champions League nomawi chawi châk a nih avangin Europe pawn lam chu a hawi a rinawm lo.

Liverpool & Chelsea

Mbappe hian kum 2020 khan Liverpool boss Jurgen Klopp chu manager ṭha tak a nih thu sawiin, Reds team chu, "Khawl ang mai an ni," tiin a lo fak tawh - Mbappe nu, a fapa transfer chungchang buaipuitu ber Fayza Lamari hi Liverpool fan a ni bawk.

French chanchinbu lar L'Equipe tana ziaktu Loic Tanzi chuan, "Liverpool hian rei tak chu Mbappe hi an lo thlithlai tawh a, Mbappe chhungkua nen hian an inbe reng a ni," a ti - mahse, a man to vanga Bellingham rim ngam lo Reds tan French striker a sang mai thei.

Mahse, Reds neitu John Henry hian Liverpool-a investment ti tur a zawn thu a sawi a, hmu ta se, Mbappe an rim ang em, tih pawh hi zawhna chhan harsa a ni. Hetihrual hian Chelsea hming pawh lam rik a ni.

Blues hian Toddy Boehly hnuaiah £550mtd chu player lakluh nan an seng tawh a, financial fair play rule ngaihtuah tel a ngai. Mahse, a man to zual Enzo Fernandez (£107mtd) leh Mykhailo Mudryk (£89mtd) hi kum riat leh a chanve atan contract an ziahpui a, hei hian FFP-ah nasa takin a hum - an duh chuan Mbappe lam hawi turin pawisa an nei.

'Messi hian a phu anga zahna a tawng lo'
- Mbappe

Khawvela footballer ropui ber ang hiala tam takin an ngaih Lionel Messi-a'n Paris St-Germain-a cham aiin chhuahsan a thlang a, a hun tawp lamah phei chuan fans ṭhenkhatin khelmualah an au el ṭhin hial.

PSG-a Messi nena khel dun Kylian Mbappe chuan, "Football chanchina player ropui ber pawl a ni a, Messi-te ang player langsarin club an chhuahsan chuan chanchin duhawm a ni thei lo," a ti a, Messi chhuak chu a ui thu a sawi.

French striker Mbappe chuan Messi duh lotu tam tak chhangletin, PSG tana an khelh dun laia a mil loh nia an sawi player hian France-ah a phu ang zahna a tawn loh thu a sawi chhuak.

Mbappe chuan, "France a chhuahsan avanga hahdam leh lawm an awm thei hi kei chuan ka hrethiam lo. France-ah hian a phu ang zahna a tawng lo a ni," a ti a, Messi a chhan hle.

Argentina tana World Cup nomawi chawitu Messi hian season hman zawh takah khan PSG tan inelna hrang hrangah match 41 khelin goal 21 a khung a, assist vawi 20 a nei.

PSG-a a cham chhungin match 75-ah goal 32 khungin assist vawi 35 a nei a, Ligue 1 nomawi pahnih leh Trophée des Champions nomawi pakhat a chawipui.

Kum 35 mi forward hian PSG-ah kum khat dang contract pawtsei thei mah se pawhsei loh a thlang a, Major League Soccer club Inter Miami a zawm tur thu a tichiang tawh.