Hlawhtlinna kawng a tawi thei lo - Jokic

Denver Nuggets champion puitu Niko Jokic chuan hlawhtlinna kawng a tawi theih loh thu a sawi a, kum 28 mi Jokic hi final-ah MVP atan thlan a ni.

Nuggets center Jokic chuan, "Hlawhtling tur chuan, ṭhat loh phawt a ngai. Chumi zawhah ṭhat a ngai leh a, ṭhat hnuah hlawhchhamna paltlang leh phawt a ngai. Hlawhchham chiah khan hlawhchhamna chhan hriat a ṭul. He tawnhriatna hlu tak neih theihna kawng hi a tawi thei lo a, kawng thui tak zawh a ngai a ni," tiin a sawi.

Jokic hian Nuggets hi a vawi khat nan NBA-ah a champion pui a, final-ah Miami Heat chu 4-1 in an hneh. Ball Arena, Denver-a hnehna an chan zawh hian Jokic hian champion a lawm hmain Heat player-te bulah kalin a va hnem phawt a, chumi zawhah champion a lawm chauh.

Serbian star Jokic hi 2021 leh 2022 khan NBA Most Valuable player-ah thlan a ni tawh a, kuminah NBA Finals MVP a ni leh bawk. NBA Draft 2014-ah khan Jokic hi 41-naah chauh thlan a ni a, MVP ni thei zinga thlan hnuhnun ber ni mah se kum kua a vei leh meuh chuan NBA nomawi a chawi ta.